Prishtinë. Ministri i Punëve të Brendshme të Kosovës, Bajram Rexhepi, bëri të ditur se në veri të Kosovës, sipas nevojës, tashmë janë vendosur forcat e njësisë speciale të Policisë së Kosovës.

"Forcat speciale të Policisë së Kosovës tashmë janë dërguar në veri të Kosovës”, ka thënë Rexhepi, raporton B92.

"Prej më shumë se një muaj kam paralajmëruar se nëse shfaqet nevoja, forcat speciale do të shtohen në veri. Kjo edhe ka ndodhur. E dini se ka pasur raste të arrestimit të kontrabandistëve edhe në Zubin Potok, në Zveçan, etj. Natyrisht se këtë e bëjmë në koordinim dhe nëse ka nevojë, edhe me EULEX-in”, ka thënë Rexhepi.

Sipas fjalëve të tij, forcat speciale dërgohen për të rritur efikasitetin e punës në veri.