Prishtinë. Në kohën kur thuajse e tërë Policia e Kosovës po drejtohet nga ushtruesit e detyrës, Ministria e Punëve të Brendshme ka marrë vendim që të shpallë konkursin për plotësimin e pozitës së drejtorit të përgjithshëm të Policisë së Kosovës, e cila gjithashtu mbahet nga një ushtrues detyre. Shpallja e konkursit për të parin e Policisë, ka ardhur vetëm një ditë pasi ishte shkarkuar drejtori i Stacionit Policor në veri të Mitrovicës dhe pas disa emërimeve e shkarkime të tjera, e që sipas ekspertëve të sigurisë, ky është një hap pozitiv, ndonëse i vonuar. Madje, sipas tyre, shkarkimi i komandantit të Stacionit të Policisë për pjesën veriore të Mitrovicës, Milija Millosheviq dhe ndërrimi i pozitave të nëntë zyrtarëve policorë flet për reformat që kanë filluar brenda Policisë së Kosovës.

Ramadan Qehaja, njohës i sigurisë, thotë se Policia e Kosovës po kalon nëpër një situatë të ndjeshme sa i përket fillimit të riformatimit. Sipas tij, ka qenë koha e fundit që merren veprime për ndryshime në akseptin menaxherial drejtues në Policinë e Kosovës dhe se ndërrimet e fundit nëpër disa drejtori rajonale flasin për aksione fillestare dhe jo të thella brenda organizatës policore.

Ndërsa, ministri i Punëve të Brendshme, Bajram Rexhepi ka sqaruar se shpallja e konkursit për drejtor të përgjithshëm Policisë së Kosovës nuk do të thotë se reformat do të prekin edhe shefin aktual të policisë, Behar Selimin, i cili që prej pesë muajsh mban pozitën e numrit një të organizatës policore. “Ne jemi të interesuar që të gjitha pozitat që mbahen me ushtrues detyre të hapen konkurset dhe të vendoset rregulli, sepse Ligji mbi Policinë krijon mundësi të tilla. Prandaj, edhe në pozitën e shefit të Policisë do të konkurrojnë të gjitha ata që vlerësojnë se i plotësojnë kriteret e parapara dhe në fund do të fitojë më i miri”, ka thënë për gazetën ministri Rexhepi.

“E kam shprehur edhe me herët se jam i kënaqur me punën e ushtruesit të detyrës, Bahar Selimit dhe sa i përket efikasitetit të punës së tij, nuk e kisha shpallur konkursin fare, por këto janë procese që duhet të ndodhin”, ka thënë Rexhepi.

Edhe kreu aktual i Policisë së Kosovës, Behar Selimi nuk e fsheh faktin se do t’i nënshtrohet garës për të marrë “timonin” e të parit të Policisë së Kosovës. Megjithatë, ai beson se do të ketë interesim të madh për të aplikuar për pozitën e drejtorit të përgjithshëm të Policisë së Kosovës.

Nga ana tjetër, kreu i MPB-së, edhe njëherë ka pohuar se lëvizjet e ndodhura ditë më parë në Policinë e Kosovës kanë pasur për qëllim shtimin e efikasitetit të punës dhe cilësisë më të mirë në Policinë e Kosovës. “Ky është një proces që do të vazhdojnë edhe në të ardhmen dhe nuk është ndonjë fushatë që do të zgjasë një apo dy ditë. Prandaj, them se do të ketë edhe më tutje ndërrime dhe do të vlerësohet performanca e secilit zyrtar policor”, ka thënë ministri Bajram Rexhepi. Duke komentuar shkarkimin e komandantit të Stacionit Policor për pjesën veriore të Mitrovicës, Milija Millosheviq, ministri Rexhepi ka theksuar se Millosheviq posedon dosje edhe në Inspektoratin Policor dhe në gjyq.

“Nëse Komisioni për Emërime të Larta dhe Disiplinë në Inspektoratin Policor do të rekomandojë që ai të ndëshkohet, atëherë normalisht se do merren edhe veprime të tilla”, ka thënë ministri Rexhepi.

Mirëpo, një zyrtar i lartë i Policisë së Kosovës i ka deklaruar gazetës në kushte anonimiteti, se gjatë dy javëve të ardhshme do të merren edhe veprime të reja nëpër drejtorit rajonale policore.

Megjithatë, i pari i Policisë së Kosovës, Behar Selimi ka theksuar se ndryshimet e ndodhura nuk kanë të bëjnë me sanksionime apo ndëshkime, por thjesht janë veprime që kanë ardhur si rezultat i reformave.