Ferizaj. Tre nxënës të gjimnazit “Kuvendi i Arbërit” janë plagosur të hënën paradite, kur një person i armatosur ka hyrë në klasë dhe ka shkrepur së paku pesë plumba në drejtim të tyre. Rasti është raportuar të ketë ndodhur rreth orës 08.50 minuta, ndërsa njëri nga nxënësit e lënduar, Argjend R. (’95) nga Ferizaj ishte dërguar në gjendje mjaft të rëndë në QKUK në Prishtinës. Dy të tjerët të lënduar, Agon H. (’94) nga Ferizaj dhe Gresa R. (’94) nga Sllatina e Vitisë, janë ndalur në spitalin e Ferizajt.

Basri Lenjani drejtor i Qendrës Emergjente të QKUK-së, ka konfirmuar se njëri nga të lënduarit në Ferizaj, në gjendje më të rëndë është dërguar në këtë Qendër, ku i është nënshtruar menjëherë operacionit. Asnjëri, sipas tij, nuk është në rrezik për jetën.

Burime të besueshme e të informuara mirë brenda shkollës, thanë se i dyshuari për plagosjen e tre nxënësve, ishte Qëndrim ( Nazmi) Jakupi, 17-vjeç, i përjashtuar një vit më parë nga gjimnazi, për shkak të sjelljeve problematike. Incidentit besohej i kishte paraprirë një ngatërresë e mëhershme ndërmjet të dyshuarit (Q.J) dhe viktimës së parë (A.R.).

Policia e Kosovës i është vënë në ndjekje të dyshuarit.

Për shkak të incidentit, procesi i mësimit në gjimnazin e Ferizajt plotësisht ishte çrregulluar. Gjatë ditës në shkollë ka qëndruar edhe kreu i komunës Bajrush Xhemaili, i cili ka vizituar edhe viktimat e plagosura në spital.