Prishtinë. Policia e Kosovës shënoi të hënën njëmbëdhjetëvjetorin e themelimit, duke qëndruar akoma larg standardeve ndërkombëtare për një polici efikase dhe plotësisht operative. Megjithatë, rezultatet e fundit në luftën kundër krimit të organizuar dhe kontrollit të kufirit shtetëror, kanë treguar për një ngritje të nivelit të sigurisë në Kosovë.

Zyrtarët qeveritarë dhe ata policorë në shënimin e ditëlindjes së Policisë thanës se ndryshimet në këtë institucion kërkojnë përkushtim të vazhdueshëm në ngritjen e kapaciteteve në baza të rregullta.

Ceremonia zyrtare e 11-vjetorit të Policisë ka nisur me parakalimin e efektivit policor, me ç’rast ministri i Punëve të Brendshme, Bajram Rexhepi, ka theksuar se ndryshimet në qasje dhe sidomos transformimi i Policisë së Kosovës nga një forcë reaguese në preventive, është duke i dhënë rezultatet e para. Megjithatë, sipas tij, këto ndryshime kërkojnë një përkushtim të vazhdueshëm si dhe ngritje të kapaciteteve në baza të rregullta.

“Si rrjedhojë ne do të vazhdojmë t’iu përkrahim në projektet e reja për trajnime të vazhdueshme dhe hapje të perspektivës për energji të reja, duke iu përshtatur nevojave të përditshme. Me qëllim të adresimit të sfidave institucionale dhe operacionale të hasura në aspektin e planifikimit strategjik dhe ofrimit të shërbimit, Policia e Kosovës tashmë ka finalizuar Planin Zhvillimor Strategjik 2011-2015”, tha ministri Rexhepi.

Zbatimi i këtij plani, siç tha ai, do të jetë një nga prioritetet kryesore të menaxhmentit të Policisë së Kosovës. “Prandaj me të drejtë presim që Policia e Kosovës së shpejti të demonstrojë rezultatet e para te partnerët tanë, bartësit e interesit, shoqërisë civile, dhe qytetarëve të vendit”, tha Rexhepi.

Edhe shefi i Policisë së Kosovës, Behar Selimi ka vlerësuar se organizata që drejton, dita ditës është duke o forcuar edhe më shumë dhe arritur rezultate të kënaqshme.

“Reformat dhe ndryshimet e vazhdueshme në polici janë të mundshme falë personelit policor që është i përkushtuar në kryerjen e detyrave për t’u përballur me çfarëdo situate dhe që të vazhdojnë me dinjitet luftimin e çfarëdo joshje korruptive që mund t’iu bëhet pavarësisht kushteve kjo të mira të punës”, është shprehur Selimi. Ai u zotua se do të bëjë përpjekje që të përmirësojë kushtet e punës të pjesëtarëve policor, dhe do të kujdesët për mirëqenien e secilit , që mënyrë që kjo organizatë të jetë shembull më i mirë jo vetëm në Kosovë, por edhe më gjerë.

Në fund të ceremonisë së shënimit të 11-vjetorit të themelimit të Policisë së Kosovës u ndanë medalje për zyrtarët policor më të dalluar, duke përfshirë edhe Sheremet Ahmetin, ushtrues detyre në Qendrën Kosovës për Siguri Publike, Edukim dhe Zhvillim në Vushtrri.