Organizata e Medieve të Evropës Juglindore (SEEMO) ka dënuar fuqishëm kërcënimet që thuhet se i janë drejtuar moderatorit të TV Klan Kosova, Baton Haxhiu, nga ish-deputeti i Kuvendit të Kosovës, Gani Geci.

Në një reagim për media të lëshuar të mërkurën, SEEMO raporton se më 9 nëntor Klan Kosova ka anuluar emisionin “Zona e debatit” për shkak të kërcënimeve që thuhet se janë bërë nga Geci, deputet nga radhët e partisë Lidhja Demokratike e Dardanisë.

“Emisioni është ndërprerë për shkak të sulmit nga Geci, i cili dhunshëm e ka penguar moderatorin Baton Haxhiu, nga nisja e emisionit”, ka pohuar Klan Kosova, në emisionin e lajmeve dhe në ueb-faqen e tyre. Më pas, në një deklaratë për media, deputeti Geci ka akuzuar se veprimet e tij kanë qenë rezultat i përpjekjes për ta përjashtuar atë nga emisioni. Klan Kosova e ka konfirmuar këtë qëllim. Geci ka braktisur hapësirën e medias para arritjes së policisë, të cilët thuhet se janë thirrur nga stacioni televiziv”, thuhet në reagimin e SEEMO-s.

“SEEMO dënon fuqishëm këtë rast dhe i konsideron veprimet e tilla si ndërhyrje dhe pengim të medieve, i përkeqësuar edhe nga fakti se kryerësi është ish-deputet”, ka deklaruar, sipas reagimit, sekretari i përgjithshëm i SEEMO-s, Oliver Vujoviq.

“Çdo veprim i tillë, posaçërisht i dhunshëm, krijon një ambient të vështirë për gazetarët; asnjë arsyetim nuk mund të pastrojë njollën që krijon veprimi i tillë. U bëjmë thirrje LDD-së dhe autoriteteve në Prishtinë që të distancohen nga veprimet e tilla”.