Me ankthin dhe brengën për fatin e 1.800 personave, të cilët 12 vjet pas përfundimit të luftës ende konsiderohen të zhdukur, të mërkurën në Prishtinë, me një sërë aktivitetesh është shënuar 27 Prilli - Dita e të Pagjeturve të Kosovës.

Si rëndom në raste të tilla, familjarët e të pagjeturve kanë marrë premtime të shumta nga autoritetet qeveritare se do të angazhohen maksimalisht për të ndihmuar procesin e zbardhjes së fatit të të pagjeturve, ndërkohë që ata kanë kërkuar më tepër angazhim institucional për zbardhjen e fatit të të pagjeturve.

Në akademinë përkujtimore, që është organizuar me këtë rast në kinemanë ABC, zëvendëskryeministri, njëkohësisht ministër i Drejtësisë, Hajredin Kuçi, ka premtuar se Qeveria e Kosovës do të angazhohet me të gjitha resurset e veta për të zbardhur fatin e të zhdukurve.

“Zbardhja e fatit të të pagjeturve është një ndër parakushtet kryesore për vendosjen e marrëdhënieve të mira fqinjësore mes dy shteteve të pavarura dhe sovrane”, tha Kuçi.

Ndërkaq, Rita Hajzeri nga Komisioni parlamentar për të pagjeturit tha se këtij komisioni nuk i intereson përkatësia nacionale e të pagjeturve. Duke premtuar angazhimin e këtij komisioni, ajo tha se është përgatitur Projektligji për të pagjeturit, për të cilin do të angazhohen që ta procedojnë sa më shpejt në Parlament. Hajzeri tha se EULEX-i i ka zhgënjyer sa i përket çështjes së të pagjeturve.

Ndërkaq Engjëll Berisha, nga Këshilli Koordinues i Asociacioneve Familjare të të Pagjeturve të Kosovës, tha se kjo ditë është kujtimi më i trishtueshëm për familjet në Meje, Rezallë, Krushë, Podujevë etj, kur atyre iu morën njerëzit e tyre dhe iu kthyen në copa eshtrash.

Ai ka rikujtuar se dita e të pagjeturve shënohet për faktin se Kosova pas lufte doli me fenomenin e zhdukjes së njerëzve të saj. Ndërkaq, duke rikujtuar mënyrën se si u morën, u vranë dhe u dërguan me mijëra njerëz në Serbi për të humbur gjurmët e krimit, ai pyeti nëse kishte ndonjë rast tjetër në botë, kur të gjallët kanë udhëtuar bashkë me të vdekurit.

“Ka mbetje mortore, por nuk ka rezultate. Ne presim rezultate”, theksoi Berisha, duke rikujtuar se ka bllokim total të informacioneve sa i përket kësaj çështjeje.

Në përfundim të kësaj akademie është shfaqur filmi dokumentar “Heshtja e eshtrave”, nëpërmes të cilit familjarët e të zhdukurve kanë drejtuar shumë kritika në adresë të Qeverisë së Kosovës sa i përket angazhimit për çështjen e të pagjeturve, por ato nuk ka pasur kush t’i dëgjojë, pasi që zëvendëskryeministri Kuçi, përkundër kërkesës së familjarëve, ishte larguar nga salla me të filluar filmi.

Në kuadër të aktiviteteve që janë organizuar për këtë ditë, në Muzeun e Kosovës është hapur një ekspozitë me artefaktet e të zhdukurve.

Një aktivitet tjetër për këtë ditë është organizuar edhe nga aktivistët e OJQ-së “Nisma Ime”, të cilët në sheshin “Zahir Pajaziti” në Prishtinë, në një mur të improvizuar kanë shkruar emrat e 1.819 perosnave të pagjetur. Kjo, sipas tyre, është bërë me qëllim të tërheqjes së vëmendjes së institucioneve dhe qytetarëve për këta persona, fati i të cilëve mbetet mister.

Murin me emrat e të zhdukurve të mërkurën pasdite e kanë vizituar dhe kanë vendosur buqeta me lule ambasadori amerikan, ai francez, anglez, si dhe komandanti i KFOR-it.