Brenda pak ditëve, tri raste të gjykimeve të gazetarëve. Vetëm katër ditë pas gjykimit të gazetares së “Zërit”, Arbana Xharra, e cila doli triumfuese ndaj një padie të ngritur nga ish kryeshefi ekzekutiv i PTK-së, Shyqyri Haxha, të premten gjatë ditës në Gjykatën Komunale në Prishtinë me fillim në ora 13:00 do të mbahet seanca gjyqësore ndaj gazetarit të së përditshmes “Express” Jeton Musliu dhe ndaj gazetares së dikurshme të kësaj gazete, tani gazetare në të përditshmen “Zëri”, Selvije Bajrami.

Asociacioni i Gazetarëve Profesionistë të Kosovës (AGPK) në një njoftim thotë se seanca ka të bëjë me një padi të cilën e ka ngritur ndaj gazetës “Express” dhe autorëve të shkrimit, ish-gjyqtari i Gjykatës së Qarkut në Prishtinë Abdullah Robaj.

“Ky i fundit pretendon se gazetarët kanë kryer veprën penale të shpifjes dhe të fyerjes në një shkrim të botuar në vitin 2009 në të përditshmen “Express”. I paditur në këtë rast është edhe ish kryeredaktori i gazetës “Express” Berat Buzhala, tani deputet në Kuvendin e Kosovës.

Rasti i tretë, ka të bëjë me gazetarin Kastriot Jahaj. Sipas AGPK-së, të premten me 27 janar, në Gjykatën Komunale në Prishtinë me fillim në ora 10:00 do të mbahet një seancë tjetër kundër gazetarit Kastriot Jahaj, autor i emisionit “Drejtësia në Kosovë”.

Rasti ka të bëjë me një padi të ngritur nga ish-gjyqtari Selman Bogiqi, për një shkrim të gazetarit Jahaj të botuar në të përditshmen “Koha Ditore”.

Ndërkohë, në një prononcim për RTK-në, paditësi Haxha, ka thënë se rasti i tij ende nuk ka përfunduar, pasi që, sipas tij, ai nuk ka marrë ftesë zyrtare nga Gjykata për tu paraqitur në seancë. Megjithatë, avokati i gazetares Arbana Xharra, Tomë Gashi, ka thënë se me mos-paraqitjen e paditësit Haxha në seancë, padia bie dhe rasti fitohet nga pala e paditur. /Zëri/