Nuk janë marrë masa ndëshkuese për profesorët universitarë, emrat e të cilëve u prezantuan në dhjetor nga Parlamenti Studentor (PS), si profesorë që mungojnë në ligjërata dhe provime.

PS-ja pas realizimit të monitorimit (hulumtimit) të procesit mësimor përmes pyetësorëve që iu shpërndanë mbi katër mijë studentëve, të cilët u deklaruan për profesorët e tyre dhe akuzuan me emra rreth 83 profesorë që janë të papërgjegjshëm, duke radhitur kështu në mesin e tyre edhe profesorët që janë të inkuadruar në politikë si Besim Beqaj, Enver Hasani, Ibrahim Gashi, Arsim Bajrami, Hajredin Kuçi, Isa Mustafa, Mazllum Baraliu... Për këta profesorë PS-ja dha ultimatum që të ndëshkohen, në të kundërtën do të bllokonte hyrjet e fakulteteve.

Mirëpo, disa javë pas publikimit të këtij raporti, studentët kanë arritur konsensus me Rektoratin. Qëllimi i këtij konsensusi është prezantuar nga studentët senatorë si një hap për të vërtetuar rezultatet e raportit dhe vetëdijesuar profesorët. Senatori nga radhët e studentëve në Senat, Arian Janova, ka thënë se pas marrjes me rezervë të rezultateve të hulumtimit rreth procesit mësimor nga rektori i UP-së, Mujë Rugova, studentët për të vërtetuar se raporti i tyre është në përputhje me gjendjen aktuale në UP, i kanë propozuar menaxhmentit të universitetit krijimin e një komisioni për të monitoruar profesorët e radhitur në listë. Ky monitorim, sipas Janovës, do të realizohet gjatë ditëve të para të semestrit të dytë.

“Propozimi i është bërë direkt rektorit Rugova, pas një takimi që kemi zhvilluar me të, duke marrë parasysh deklarimin e tij se do të marrë me rezervë raportin. Ne kemi propozuar formimin e një komisioni me përbërje të dy studentëve, një prorektori dhe dy dekanë”, ka thënë Janova, duke shtuar se ky komision do të monitorojë mbarëvajtjen e ligjëratave dhe prezencën e profesorëve në ligjërata gjatë ditëve të para të semestrit veror që do të fillojë më 15 shkurt. “Komisioni më pas do t’i raportojë Senatit dhe profesorët që rezultojnë se nuk kanë vijuar ligjëratat do të merret vendim për ndëshkim të tyre në Senat”. Ai ka thënë se propozimi i studentëve, sipas premtimit të rektorit, do të dalë në mbledhjen e ardhshme të Senatit.

Janova ka mohuar ndërhyrjet që mund të ketë Rektorati në komision, me arsyetimin se në këtë komision do të jenë dy përfaqësues të studentëve që do të monitorojnë bashkë me dekanët dhe prorektorin që do të emërohet. PS-ja ka deklaruar se hulumtimi ka pasur efekt pasi profesorët e përmendur si të papërgjegjshëm kanë nisur të duken në fakultete. Janova ka thënë se këta profesorë kanë filluar të jenë më të përgjegjshëm gjatë mbajtjes së provimeve që po mbahen tash në UP.

Monitorimi i realizuar në të gjitha njësitë akademike të universitetit, i përmbyllur me plotësimin e katër mijë pyetësorëve nga studentët, ku janë parashtruar gjithsej 80 mijë pyetje që kanë përfshirë të gjitha aktivitetet akademike e administrative në universitet, ende pa dhënë rezultatet konkrete është tentuar të manipulohet.