Pas angazhimit të katër kompanive shtesë, janë zhbollkuar rrugët e fshatrave të komunës së Mitrovicës, madje edhe ato të zonave të thella malore të Shalës së Bajgorës. Këtë e ka konfirmuar Rasim Veseli, drejtor për Infrastrukturë dhe Shërbime Publike, sipas të cilit trashësia e borës në shumë zona të thella kishte arritur deri në dy metra.

Ai tha se shumica e fshatrave kanë qenë të bllokuara nga bora e madhe, për çka jemi detyruar të angazhojmë katër kompani shtesë për pastrimin e rrugëve.Veseli sqaroi se përveç kompanisë ndërkomunale “Uniteti”, e cila është e kontraktuar nga komuna për mirëmbajtjen e rrugëve, këto ditë nga Drejtoria për Infrastrukturë dhe Shërbime Publike janë angazhuar edhe “Tropiku”, Urbani”, “Haxhacom” dhe kompania “Eurondërtimi” që është angazhuar nga Drejtoria për Mbrojtje dhe Shpëtim.

Sipas Veselit, tash të gjitha rrugët kryesore janë të hapura. Ai bëri me dije se është intervenuar në lagjet dhe fshatrat e veriut, në Suhadoll, Kroin e Vitakut, Lagjen e Doktorëve, Vidimriq, Gushavc, Vinarc, Vaganicë, Vërrnicë, Kçiq dhe Shupkovc për të vazhduar në zonat më të thella malore.

Në fshatrat e Shalës trashësia e borës ka qenë shumë e madhe dhe është dashur të intervenohet me makineri të rëndë, tha Veseli dhe shtoi se është hapur rruga për Vllahi, Ravohë, Rashan, Mazhiq, Vidishiq, Bajgorë, Selac etj. “Tash është një situatë më e mirë në të gjitha rrugët e komunës”, tha ai, dhe shtoi se gjatë vikendit është hedhur kripë edhe në trotuaret e rrugëve të qytetit.

Sa u përket fshatrave shqiptare të komunës së Leposaviqit, zyrtarët komunalë kanë thënë se deri me tani është pastruar rruga prej magjistrales së Ibrit deri në fshatin Koshtovë.

Drejtori për Mbrojtje dhe Shpëtim, Behxhet Bala, tha se ajo pjesë e rrugës është pastruar nga një kompani e angazhuar nga KFOR-i, kurse komuna ka marrë përsipër të mbulojë shpenzimet për vazhdimin e pastrimit të rrugëve në drejtim të fshatit Cerajë dhe Bistricë. Sipas tij, është bërë gati një kontingjent me ushqime për banorët e këtyre fshatrave, që pritet të dërgohen me ndihmën e KFOR-it.