Katër mjekë, të cilët krahas edhe të disa mjekëve dhe të infermierëve të tjerë nuk janë përfshirë në listat e një të ashtuquajturi Sektor Emergjent i Mjekësisë në rrethana të luftës, kanë marrë përkrahjen e komandantëve të luftës, të cilët nëpërmes të një deklarate kanë dëshmuar “se ata (mjekët) u kanë dhënë ndihmë mjekësore të jashtëzakonshme popullatës në Rezallë dhe në Likofc gjatë luftës”.

Në një deklaratë-dëshmi, e cila gjithashtu u është dorëzuar shoqatave të dala nga lufta, ndër të tjera thuhet:

“Bindshëm deklarojmë dhe dëshmojmë se dr. Feride Deliu, pediatre, dr. Riza Malaj, gjinekolog, dr. Bedri Shala, specialist i mjekësisë së përgjithshme dhe dr. Nexhmedin Osmani, stomatolog, kanë dhënë kontribut të jashtëzakonshmëm në mjekimin dhe ndihmën mjekësore popullatës në bashkësinë lokale të Rezallës dhe të Likofcit në periudhën deri te ofansiva në Rezallë dhe më vonë. Për këtë kontribut u është mirënjohëse popullata e kësaj ane, por edhe popullata e zhvendosur në këtë pjesë të Drenicës. Me respekt të veçantë i falënderon edhe udhëheqja e UÇK-së. Për këtë e lëshojmë këtë deklaratë. Dëshmojnë: Ilaz Dërguti, komandant i Kompanisë, Ahmet Zabeli, zv/komandanti dhe Afrim Gashi, teknik medicinal, përgjegjës për shëndetësi”, precizohet në deklaratë-dëshminë e komandantëve të luftës.

Në të njejtën deklaratë-dëshmi është prononcuar dhe ka dëshmuar edhe komandanti i Brigadës 113 “Mujë Krasniqi”.

“Mjekët e sipërpërmendur janë angazhuar maksimalisht në dhënien e ndihmës mjekësore civilëve dhe ushtarëve në territorin e Brigadës 113”, ka deklaruar Hisni Shabani, komandant i Brigadës 113 “Mujë Krasniqi”.

Ndryshe, reagime të shumta kanë ardhur pas bërjes publike të një dokumenti të lëshuar nga Sektori i Emergjencave Mjekësore në rrethana të luftës, të nënshkruar nga dr. Nazif Goxhuli, koordinator. Disa nga mjekët, këtë sektor e kanë quajtur të trilluar dhe të falsifikuar me qëllime për përfituar në kurriz të të tjerëve dhe me qëllim të përvetësimit të meritave të të tjerëve.

Nga ky dokument, pos dr. Riza Malës, dr. Feride Deliut, dr. Bedri Shalës dhe dr. Nexhmedin Osmanit, janë “përjashtuar “edhe mjekë dhe infermierë të tjerë: dr. Xhevdet Latifi, dr. Enver Beqiri, infermieret Zyrafete Thaçi, Emine Hamza... Kjo e fundit, siç dëshmojnë shumë të zhvendosur, u ka dhënë ndihmë mjekësore popullatës së grumbulluar në Klinë të Poshtme.

Dr. Fatmir Kabashi, aktualisht mjek në Klinikën Universitare për Traumatologji në Vjenë të Austrisë, i cili në kohen e luftës ka udhëhequr me ambulancën në Polac, thotë se me ambulancën në Prekaz ka udhëhequr dr. Xhevdet Latifi.

“Po atje ka vepruar dr. Xhevdet Latifi, dr. Enver Beqiri e të tjerë. Kontribut të madh në ndihmë mjekësore popullates ka dhënë edhe një dr. Grajçevci i Hadës, pastaj dr. Pajazit Pllana i Vushtrrisë, por edhe shumë të tjerë“, ka deklaruar ai, sipas të cilit, në Polac ndihmë mjekësore kanë marrë edhe Sami Lushtaku, i cili ishte plagosur në afërsi të Rahovecit dhe komandanti Ilaz Kodra.