Studentët e Universitetit të Prishtinës (UP) kërkojnë rivlerësim të punës shkencore të profesorëve dhe literaturës që ofrojnë për studentët. Profesorët duhet të rivlerësohen çdo pesë vjet për dijen e tyre. Kjo është kërkesa e fundit e Parlamentit Studentor (PS), e dalë pas verifikimit të mungesës së literaturës bashkëkohore në UP.

Krejt literatura që kanë në shfrytëzim dhe iu imponohet si literaturë bazë studentëve, tani përbëhet kryesisht prej librave të profesorëve që ligjërojnë lëndën përkatëse. Studentët edhe pse nuk preferojnë librat me autorë profesorët e tyre, në anën tjetër nuk shohin zgjidhje tjetër të mundshme për të dhënë provimet. Këtë e zgjedhin me dëshirë, që të japin provimin, por e quajnë detyrim sipas rrethanave në të cilat studiojnë.

Studentët i janë drejtuar Ministrisë së Arsimit, Shkencës dhe Teknologjisë së Kosovës (MASHT) dhe Rektoratit duke kërkuar që profesorët të ripërtërijnë literaturën ose të mos rekomandojnë si literaturë bazë librat e tyre.

Kryetari i PS-së, Mentor Hasani, ka thënë se nga disa profesorë iu imponohet studentëve që të përdorin vetëm librat e tyre si bazë për përgatitje të provimit dhe t’i blejnë ato në vlerë nga 15 deri në 20 euro.

“Ka shumë studentë që nuk kanë mundësi të blejnë librat e detyrohen t’i marrin në fotokopje të ndryshme. Mungon shumë literatura bashkëkohore”, ka thënë ai duke bërë të ditur se ka po ashtu profesorë në UP që ka vetëm një libër të botuar dhe ka një jetë të tërë që punon në Universitet.

“E ka një libër dhe më nuk ka bërë asgjë për shkencën, mirëpo ai punon me libra të huaj dhe nuk ka hulumtime nga ana e tij”. Kjo, sipas tij, kërkon urgjentisht që profesorët t’iu nënshtrohen vlerësimeve për punën hulumtuese shkencore dhe kjo të zbatohet çdo pesë vjet.

“Duhet të formohet një komision nga Ministria dhe Rektorati, për të parë se sa publikime kanë profesorët dhe sa janë në gjendje të ofrojnë gjëra të reja, zbulime dhe hulumtime të reja në shkencë”.

PS-ja ka konstatuar se pas hulumtimit dhe nxjerrjes së rezultateve mungesa më e madhe e literaturës është paraqitur në Fakultetin e Mjekësisë. Menaxhmenti i UP-së nuk sheh ndonjë shqetësim tek njohuritë dhe literatura e profesorëve.

Prorektori për çështje akademike në UP, Bajram Berisha, ka thënë se me statut parashihet vlerësimi i profesorëve.

“Rizgjedhja e profesorëve bëhet në bazë të punës së tyre shkencore dhe arsimore. Sipas statutit, janë nene të veçanta se si zgjidhet stafi akademik për të gjitha kategoritë, nga asistentët e rinj, asistentët, profesorë asistentëve, profesorëve të rregullt. Ata i nënshtrohen rivlerësimit ose vlerësimit në periudha të caktuara kohore. Asistentët çdo tre vjet dhe profesorët çdo katër vjet”.

Berisha ka theksuar se çdo profesor deri sa ta marrë titullin profesor i rregullt, i nënshtrohet vlerësimit nga ana e komisionit recensues, nga ana e këshillit të fakultetit, komisionit të studimeve dhe Senatit të UP-së.

“Profesorëve të rregullt, sipas statutit, nuk iu hapet vendi i punës i lirë, dhe nuk ekziston ndonjë metodë e veçantë për rivlerësimin e tyre”, ka thënë Berisha, duke e sqaruar këtë rregull si një veprim që ndiqet dhe nga universitetet tjera jashtë Kosovës. PS-ja ka paralajmëruar që një kërkesë për rivlerësim të punës shkencore ta adresojë dhe në Akademinë e Shkencave.

Dyshime rreth punës akademike të profesorëve

Sipas Parlamentit të Studentëve, vlerësimi i profesorëve duhet të aplikohet çdo pesë vjet për të parë sa kanë aftësi e njohuri profesorët për t’iu ofruar studentëve. “Shumë shpejt do t’i drejtohemi edhe me shkrim MASHT-it dhe Rektoratit”, ka thënë Hasani.