Bora e rënë ka mbetur “relikt” në rrugët dhe në trotuaret e kryeqendrës së Kosovës. Prishtina është bërë “ferr” për këmbësorët. Të nisur për të shkuar në ligjërata, shkollë, në punë, apo të bëjnë pazar…jo pak qytetarë kosovarë kanë pësuar dhe e kanë gjetur veten të shtrirë në Emergjencën e Qendrës Klinike Universitare të Kosovës.

Lëndime që iu kanë shkaktuar gjakderdhje në tru, dëmtimin e unazave të boshtit kurrizor, thyerje dhe lëndime të ndryshme të gjymtyrëve, janë rastet që janë trajtuar në Qendrën Emergjente të Kosovës, duke rritur kështu numrin e rasteve në këtë qendër ditëve të fundit.

Këmbësorët radhiten në listat e mjekimit të kësaj qendre që kanë kërkuar ndihmë më së shumti, përderisa në kategorinë e komunikacionit rastet janë më të pakta.

“Shtetit do t’i kushtonte më pak të pastronte rrugët, sesa tash që duhet të shërojë një invalid”, shprehet shefi i ndërrimit në Qendrën Emergjente, Avdush Bajgora, duke përshkruar rastet që janë trajtuar dhe vazhdojnë të trajtohen në këtë qendër si pasojë e rrëshqitjes në rrugë dhe në trotuaret me ngrica si dhe pasojat serioze që do të kenë në të ardhmen këta qytetarë si pasojë e lëndimeve të marra.

“Numri i atyre që kanë kërkuar ndihmë në qendrën tonë është më i lartë sesa kur nuk ka pasur borë”, thotë ai, ndonëse nuk do të bëjë publik këtë shifër.

Përderisa Bajgora përshkruan dhe fajëson kompetentët se rrugët e Prishtinës ngjasojnë me një fushë skijimi, edhe shkallët (hyrja) e kësaj qendre ishte pothuajse e pakalueshme. Për të hyrë në këtë qendër, ose duhej të mbahesh fort në dy anët e shkallëve, ose mundësia tjetër të shfrytëzosh disa shkallë dërrase të improvizuara për shkak të rinovimeve të hyrjes tjetër të kësaj qendre, në mënyrë që të hysh apo të dalësh nga QKUK-ja pa pësuar.

Në këtë gjendje të trotuareve dhe rrugëve tona vetëm dielli mund të shpëtojë qytetarët e Kosovës. Instituti Hidrometeorologjik i Kosovës paralajmëron ngritje të temperaturave, por aq sa të shkrijnë trotuaret.

Sipas të dhënave të këtij instituti, Tahirsylaj tha se prej të enjtes në mbrëmje do të ketë reshje bore, por jo edhe ulje të temperaturave. Kjo gjendje sinoptike do të zgjasë, sipas tij, deri të martën. Por, gjendja aktuale e temperaturave i ka shqetësuar qytetarët për shkak të izolimit nga bora dhe ngricat.

Rreth 800 banorë të fshatit Brusë të Lipjanit kanë mbetur të izoluar deri në mbrëmjen e së martës. Fshatit i janë hapur rrugët nga pjesëtarët e Forcës së Sigurisë të Kosovës (FSK).

Nënkoloneli i FSK-së Shemsi Syla, komandant i njësisë për reagim në kriza, ka theksuar se pjesëtarët e FSK-së janë duke punuar me orar të trefishuar për të hapur rrugët. Përpjekjet për të “çliruar “ qytetarët nga bora, sipas Sylës kanë ndikuar që orari i punës të vazhdojë deri në orët e vona të mbrëmjes.

Syla ka sqaruar se pjesëtarët e Njësisë për reagim dhe kriza janë duke bërë analizën e bllokimit të rrugëve dhe nivelit të borës, kurse ata të Brigadës Mbështetëse Operacionale, ndërhyjnë me makineri ku analiza tregon situatë emergjente.

Që prej datës 26 janar, ai ka thënë se trupat e FSK-së ndodhen në terren dhe kanë larguar borë në disa rrugë të rajoneve të ndryshme të Kosovës. Ai ka theksuar se njësitet e FSK-së tash janë duke bërë përpjekje që të zhbllokojnë rrugët që lidhin fshatrat e Malësisë së Berishës.

Drejtori i arsimit në komunën e Dragashit Hajri Ramadani ka theksuar se procesi mësimor është duke u mbajtur normalisht dhe për të mos u paraqitur probleme në rrugë nga bora dhe ngrica, kësaj komune i ka dalë në ndihmë KFOR-i gjerman dhe ai austriak, si dhe njësitet e FSK-së.

“Me rënien e borës së parë në dhjetor ndërpremë mësimin, u desh që ato orë të kompensohen, por tani jemi duke bërë përpjekje që të mos ndërpritet mësimi pasi është problem të zëvendësohen orët e humbura”, tha ai.

E, Komuna e Prishtinës e cila ka përgjegjësinë e përzgjedhjes dhe kontraktimit të kompanive për pastrimin e rrugëve ka qëndruar indiferente gjatë këtyre ditëve, kurse qytetarë të shumtë janë shtrirë nëpër spitale si pasojë e mospastrimit të rrugëve.

Drejtori i shërbimeve publike në Komunën e Prishtinës, Agim Gashi, i kontaktuar nga gazeta është arsyetuar se gjendet në një mbledhje dhe se nuk mund të flasë.