Ekzekutivi i Kaçanikut e ka shpallur gjendjen emergjente në territorin e komunës, të enjten, pas reshjeve të fundit të borës të shoqëruara me erë të fuqishme.

“Në takimin e sotëm ekzekutivi komunal ka marrë vendim për shpalljen e gjendjes emergjente në tërë territorin e komunës”, ka theksuar Hajrush Dullovi, zëdhënës i KK të Kaçanikut, të enjten, raporton “Koha”.

Në këtë kontekst, ai ka pohuar se është vendosur që mësimi në shkollat fillore dhe të mesme të mos zhvillohet të enjten dhe të premten.

“Reshjet e pandërprera të borës të shoqëruara me erë të fuqishme kanë krijuar ortekë që i kanë bllokuar shumicën e rrugëve në territorin e komunës”, ka nënvizuar zëdhënësi Dullovi.

Sipas tij, kompania e kontraktuar për mirëmbajtjen e rrugëve është duke punuar pa ndërprerje me tërë potencialin e saj jo vetëm teknik për zhbllokimin e rrugëve. /koha/