Përfaqësuesit e Qeverisë së Kosovës janë zotuar se do t’u dalin në ndihmë të gjithë qytetarëve të Kosovës, në rast se do të ketë vërshime pas shkrirjes së borës. Madje, ata thanë se edhe nëse do të ketë vërshime, ato nuk do t’i zënë në befasi, sepse institucionet trashmë janë duke hartuar planin e veprimit.

Ndërsa drejtori i Institutit Meteorologjik të Kosovës, Sylë Tahirsylaj, ka përjashtuar mundësinë e vërshimeve deri në mesin e kësaj jave.

Zëvendësministri i Punëve të Brendshme të Kosovës, Ismet Ibishi, tha se Qeveria e Kosovës do t’u dalë në ndihmë qytetarëve me të gjitha kapacitetet e mundshme që posedon.

Përvoja me të reshurat, sipas tij, nuk do t’i lërë që vërshimet t’i zënë në befasi. “Ne do t’i aktivizojmë të gjitha resurset lokale dhe ato qendrore dhe do të jemi në gatishmëri për t’u ballafaquar me situatën që do të na paraqitet dhe do t’u ofrojmë qytetarëve maksimumin e mundshëm që posedojmë si qeveri”, ka thënë Ibishi.

Sipas tij, Agjencia për Menaxhimin e Emergjencave (AME) brenda dy tre ditësh të ta prezantojë planin e detajizuar për veprim në rast krize të shkaktuar nga vërshimet e mundshme.

E sipas Tahirsylës, në fillim të kësaj jave do të këtë ngritje të temperaturave, mirëpo nuk do të ketë vërshime të shpejta. ““Edhe si departament i ministrisë edhe si institut jemi duke e përgatitur një plan veprimi dhe besoj që këto ditë ky plan do të shpaloset edhe para medieve”, ka thënë ai.

Sipas tij, minus 7 gradë natën dhe plus 3 gradë ditën nuk do të mund të shkaktojnë vërshime. “Është krijuar një shtresë e akullit në shkallë vendi dhe raporti i radiacionit të tokës dhe instilacionit të tokës, nuk lënë mundësi të shkaktimit të menjëhershëm të vërshimeve. Po ashtu edhe erëra nuk do të ketë, kështu që vërshime nuk do të mund të ketë deri në javën e ardhshme”, ka thënë Tahirsylaj.

Zëvendësministri i Punëve të Brendshme, Ismet Ibishi, ka thënë pas të reshura të mëdha të borës, ka kërkuar hartimin e një plani veprimi në rast të vërshimeve. “Ne nuk mund të themi që nuk do të ketë vërshime, sipas të gjitha gjasave vërshime do të ketë, mirëpo duke pasur parasysh konfi guracionin e terrenit dhe vlerësimin e rreziqeve nuk presim që të eskalojë situata në kuptimin e rrezikimit të jetëve të njerëzve ”, ka thënë Ibishi.

“Agjencia për Menaxhimin e Emergjencave ka për detyrë që brenda dy tre ditësh të na prezantojë planin e detajizuar për veprim në rast krize të shkaktuar nga vërshimet e mundshme. Aktualisht nuk mund të flas për detaje se si mund të veprohet në Prishtinë apo në rajone të tjera të Kosovës, ngase në hartim e sipër janë planet e veprimit dhe shumë shpejt do t’i kemi në duar këto plane konkrete”, ka thënë Ibishi.

Sipas tij, aktualisht është duke u bërë vlerësimi i rreziqeve. Ai ka thënë se duke ditur edhe sasinë e rënies së borës dhe duke i përcjellë kushtet klimatike se sa do të ngrihen temperaturat, Qeveria do të jetë në hap me kohën dhe do të mund t’u dalë në ndihmë qytetarëve.