Prishtinë. Qeveria e Kosovës po vazhdon “luftën” e saj në tri fronte për të zbardhur të vërtetën lidhur me ekzistimin e mundshëm të tri varrezave masive në tri shtetet fqinj në Serbi, Mal të Zi dhe Maqedoni.

Ministri i Drejtësisë, Haki Demolli tha se Kosova po përballet me vështirësi të shumta sa u përket varrezave të dyshuara në Rashkë të Serbisë. Sipas tij, me dy shtetet fqinje Maqedoninë dhe Malin e Zi është më e lehte për të komunikuar. “Vështirësia kryesore është që të vihet deri te informata apo sigurimi dhe verifikimi i saj. Kurse në anën tjetër problemi kryesor me Serbinë është mungesa e komunikimit të drejtpërdrejtë mes ministrive dhe institucioneve përkatëse”, tha Demolli.

Sipas tij, aktualisht komunikimi me Serbinë është duke shkuar përmes EULEX-it, ndërsa me Maqedoninë dhe Malin e Zi, çdo gjë është korrekte në kuptimin e këmbimit të informatave institucionale. “Problemin më të madh e kemi derisa të konfirmohet informata prej burimeve të sakta dhe se aktualisht jemi duke i hetuar vendet e dyshimta. Ne vetëm i sigurojmë informatat, ndërkaq mjetet janë siguruar nga Qeveria blege përmes një marrëveshjeje të nënshkruar me ambasadën e tyre këtu në Kosovë”, tha Demolli,

Sa i përket varrezës në Andrijevicë të Malit të Zi, ministri Demolli tha se atje kanë shkuar ekspertët dhe janë duke e hulumtuar gjendjen. “Mali i Zi ka kërkuar mjete për të bërë hapjen e hapësirave, ku dyshohet të jenë varrosur kufomat. Fatmirësisht, ata nuk kanë kërkuar mjete të mëdha. Ne kemi dyshuar se do të kërkojnë shuma më të mëdha mjetesh, mirëpo ata kanë kërkuar një shumë prej 4-5 mijë euro, shumë kjo që nuk është e madhe”, tha ai.

Ndërkaq, rreth varrezës në Butel të Maqedonisë, Demolli tha se janë në pritje të formimit të një grupi ndërqeveritar apo ndërministror për shkak se konsiderohet se duhet të jetë edhe Ministria e Punëve të Brendshme dhe Ministria e Drejtësisë. “Unë kam pasur një takim me Ambasadën e Maqedonisë dhe jemi në pritje të përgjegjësive të palëve në këtë çështje. Ndonëse ata kanë qenë shumë korrektë në takimet e para dhe se aktualisht jemi në proces e sipër të rregullimit të kësaj çështjeje”, tha Demolli.

Ndërsa, Prenk Gjetaj, kryetar i Komisionit për të pagjeturit, tha se sa i përket varrezës në Mal të Zi, deri më tash është bërë një hulumtim dhe sipas informacioneve, janë gjetur disa eshtra, origjina e të cilëve nuk është ditur. Kjo ka bërë që të fillohet hulumtimi, por këto hulumtime nuk kanë dhënë ndonjë rezultat pozitiv. Tash për tash këto informacione i konsiderojmë si jozyrtare dhe se zyrtarisht ende asgjë nuk kam marrë.

Ndërsa sa i përket varrezës masive në Rashkë, aty janë bërë disa shpime kalibrore nga Fakulteti Teknik i Beogradit, i cili i ka marrë mostrat e dheut për analiza. Tash për tash rezultatet e analizës nuk dihen, mirëpo vërehet se ka lëvizje të dheut posaçërisht nën objektin e ndërtuar pas luftës në Kosovë.

Ndërsa sa u përket dyshimeve të varrezës në Maqedoni, ai tha se janë disa varre në varrezat e Butelit. Ndonëse pala maqedonase nuk e ka pranuar se ka trupa të dyshimtë.

Sipas tyre, ata janë trupa që kanë vdekur si refugjatë. Mirëpo, në anën tjetër ne kemi informacione se aty janë varrosur trupa të vrarë në Kosovë, të cilët janë hedhur në lumin Lepenc dhe lumi i ka bartur në Maqedoni, ku janë gjetur nga qytetarët e atjeshëm dhe janë varrosur në Butel. Ndërkaq, tash pas lufte ato varre nuk janë. “Dëshmitarë anonimë na kanë njoftuar se ato varre janë zhdukur”, tha Gjetaj.