Beograd. Ambasadori britanik në Beograd, Stephen Wordsworth tha se nëse Serbia injoron mendimin e BE-së, politika të tilla mund ta çojnë vendin në izolim.

Ai tha se Serbia mund të kthehet në izolim nëse vazhdon ta injorojë BE-në dhe “bën çfarë të dëshirojë”, duke iu referuar rezolutës për Kosovën të cilën Serbia e ka dërguar në Asamblenë e Përgjithshme të Kombeve të Bashkuara pa u konsultuar me komunitetin ndërkombëtar.

“Çelësi i integrimit të shpejtë në BE ka të bëjë me përkushtimin, bashkëpunimin dhe investimin e plotë, 100 për qind, dhe të gjithë ata që nuk janë të përgatitur nuk duhet të aplikojnë për anëtarësim”, tha Wordsworth, raporton agjencia serbe e lajmeve, B92.

Ai tha se Serbia do të ketë një mik të mirë në Britani të Madhe nëse i ndërmerr të gjithë hapat e nevojshëm.

“Serbia është përkushtuar për atë proces për të cilin janë edhe fqinjët e saj, dhe për këtë proces ka nevojë për kohë. Për këtë arsye nuk është mençuri të caktohen afate të pavërteta pasi që ato çojnë në zhgënjim”, u shpreh Wordsworth, raporton B92.