Në një intervistë për BBC në gjuhën shqipe, Zëvendëskryeministri dhe Ministri i Punëve të Jashtme të Shqipërisë, Ilir Meta shpreh bindjen për vazhdimësinë e njohjeve të Kosovës dhe nënvizon faktin se Kosova është në një rrugë shumë të mirë pas Opinionit Këshillimor të GJND-së.

I pyetur nëse heqja e pjesës ku kërkoheshin bisedime për statusin e Kosovës në rezolutën e Serbisë do të ndikojë në diçka që Kosovës do t’i duhet të paguajë, Meta u shpreh se nuk beson që BE do të propozonte diçka që është në dëm të Kosovës.

“Absolutisht që nuk besoj se BE propozon një alternativë që është në dëm të Kosovës. Përkundrazi, gjithë kjo ndërmarrje e jashtëzakonshme për të patur një konsensus të 27 vendeve, synon të ndihmojë konsolidimin e shtetit të Kosovës, për të mos vënë në pikëpyetje statusin e saj, sovranitetin dhe integritetin e shtetit, dhe natyrisht që nxitjet për dialog synojnë ato tema që kanë qenë të njohura nga SHBA dhe BE, që kanë të bëjnë me çështje të një natyre praktike dhe konkrete që përmirësojnë jetën e qytetarëve të Kosovës”, tha Ilir Meta.

Sot pritet të mbahet mbledhja e Asamblesë së Përgjithshme të Kombeve të Bashkuara, ku do të diskutohet rezoluta e ndryshuar e Serbisë. Zëvendëskryeministri i Shqipërisë, Ilir Meta, përmendi dy alternativa të mundshme për tu realizuar gjatë kësaj seance.

“Dy janë alternativat. E para është që të formalizohet dhe të procedohet me konsensusin. Në këtë rast, natyrisht që do të dominonte fryma e konsensusit dhe jo e votimit. Ndërsa alternativa tjetër, për të cilën ne vazhdojmë të punojmë dhe kemi kaq kohë që po e bëjmë, është ajo e rrëzimit në mënyrë tepër bindëse e rezolutës së Serbisë, në rast se ajo do ti shmanget kompromisit me Bashkimin Evropian”, u shpreh Ilir Meta.

Ministri Meta foli edhe për turneun e tij lobues për njohje të reja për shtetin e Kosovës, i cili shprehu bindjen e tij se së shpejti edhe pjesa e mbetur e shteteve anëtare të Konferencës Islamike pritet ta njohin Kosovën.

“Natyrisht që një pjesë e mirë, gati më tepër se një e treta e vendeve islamike, e kanë njohur Kosovën. Në takimin që unë kam patur dje me 57 Ambasadorët e OKI, kam paraqitur edhe një herë të gjitha çështjet për të cilat ne kontestojmë dhe kërkojmë votimin kundër miratimin të rezolutës, dhe sigurisht që kemi apeluar për të thelluar njohjet e të gjitha atyre vendeve të kësaj Konference, të cilat ende nuk e kanë bërë publike njohjen e shtetit të ri të Kosovës, por që unë jam i bindur se kjo gjë do të ndodhë shumë shpejt”, tha ministri Meta.

Ministri i Jashtëm i Shqipërisë, Ilir Meta, tha se Kosova është në rrugë shumë pozitive për tu anëtarësuar në OKB brenda disa muajsh, duke siguruar numrin e mjaftueshëm të votave të nevojshme për anëtarësim.

“Absolutisht që Kosova është në një rrugë shumë pozitive, sidomos pas vendimit të GJND-së. Jam tepër i bindur që shumë shpejt, procesi i njohjeve do të jetë i pandalshëm, dhe jam i bindur se edhe ndryshimi i rezolutës serbe do ti shërbejë këtij procesi”, tha për fund Ilir Meta në intervistën dhënë BBC-së.