Qeveria e Spanjës e ka përshëndetur marrëveshjen e arritur ndërmjet Serbisë e Bashkimit Evropian, për propozim rezolutën e Serbisë për Kosovën në Asamblenë e Përgjithshme të OKB-së.

“Spanja dëshiron të shpreh kënaqësinë e saj të thellë” për marrëveshjen Serbi-BE, thuhet në njoftimin e ministrisë së jashtme të këtij vendi.

Mëtutje, theksohet se propozim teksti i ri, “fton për dialog ndërmjet Beogradit e Prishtinës, në harmoni me qëndrimin tonë kryesor se zgjidhja e pranueshme në mënyrë reciproke, mund të gjendet nëpërmjet negociatave”.

Spanja është në mesin e pesë vendeve anëtare të BE-së, që nuk e ka njohur Kosovën.

. . .

Kouchner: Hap kah normalizimi i raporteve Serbi - Kosovë

Franca i uron Serbisë për marrëveshjen e arritur me Bashkimin Evropian, për propozim rezolutën për Kosovën, në Asamblenë e Përgjithshme të OKB-së, tha ministri i jashtëm francez, Bernard Kouchner.

“Kjo marrëveshje e hap rrugën e dialogut ndërmjet Prishtinës e Beogradit, që Franca gjithnjë e ka dëshiruar”, tha zoti Kouchner, dhe ka shtuar se “ky dialog është i nevojshëm për nxitjen e bashkëpunimit, për përparime në rrugën kah Evropa dhe për përmirësimin e jetës së të gjithëve”.

Sipas tij, ky është edhe “një hap kah normalizimi i raporteve ndërmjet Serbisë e Kosovës”.

Mëtutje, në njoftimin nga zyra e tij, ministri Kouchner, thekson se e kishte thirrur presidentin e Serbisë, Boris Tadiq, për t’i uruar arritjen e marrëveshjes, e kishte falënderuar shefen e politikës së jashtme të BE-së, Catherine Ashton, dhe me telefon kishte biseduar me kryeministrin e Kosovës, Hashim Thaçi.

. . .

Westerwelle: Pres fillim sa më të shpejtë të bisedimeve

Ministri i jashtëm gjerman, Guido Westerwelle të enjten ka mirëpritur vendimin e Serbisë për ta zbutur projekt-rezolutën e saj për Kosovën, e cila do të diskutohet në orët e mbrëmjes në AP të OKB-së.

“Ky është një sinjal i qartë se Serbia e sheh të ardhmen e saj në BE”, tha Westerwelle, duke shtuar se vendimi i marrë nga presidenti serb, Boris Tadiq ka qenë një “hap i rëndësishëm” dhe një “sukses i politikës së jashtme evropiane”.

“U bëj thirrje të gjitha palëve t’i nisin bisedimet sa më shpejtë dhe të çojnë në rezultatet konkrete për popullatën”, kërkoi Westerwelle.