Dy liderët e partive më të mëdha shqiptare, Ali Ahmeti i Bashkimit Demokratik për Integrim (BDI) dhe Menduh Thaçi i Partisë Demokratike Shqiptare (PDSH) do të heqin dorë nga parlamenti dhe do tu përkushtohen vetëm punëve në parti.

Meqë 2012 është një vit parazgjedhor, të dy liderët këmbëngulin që ti fitojnë zgjedhjet lokale të vitit të ardhshëm, ndaj ata kanë menduar që të heqin dorë nga mandate i deputetit, pasi edhe gjatë muajve të kaluar radhe kanë shkuar nëpër seancat parlamentare dhe të angazhohen në organizimet brenda partive që ata drejtojnë.

Burime të sigurta të “Lajm”-it brenda partisë së Ahmetit pohojnë se për shkak të angazhimeve të shumta lideri i tyre do ta dorëzojë mandatin e deputetit dhe do të përqendrohet me organizimet në parti. “Meqë ky vit është vit parazgjedhor, kryetari Ahmeti dëshiron që të fitojë bindshëm në zgjedhjet lokale, prandaj ai do të heqë dorë nga parlamenti dhe do ti përkushtohet partisë”, tha i njëjti burim.

Po ashtu edhe burime të besuara të PDSH-së pohojnë se lideri i partisë Menduh Thaçi do të heqë dorë nga puna në parlament dhe do të merret me organizimin e brendshëm të partisë me qëllim që ti fitojë zgjedhjet e ardhshme.

Nga BDI thonë se është e palogjikshme që lideri i një partie të mos jetë deputet.

“Është shumë e logjikshme që njeriu i parë i partisë të mungojë në një numër të seancave të organit ligjdhënës, sidomos duke marrë parasysh angazhimet e mëdha në kuadër të pozicionit të tij si kryetar partie, por angazhime të cilat nuk janë vetëm në favor të partisë për një politikë shtetërorë dhe kombëtare. Nga ana tjetër është shumë politikisht e arsyeshme dhe logjikisht që njeriu i parë i partisë të jetë i përfaqësuar në organin më të lartë ligjdhënës sidomos lidhur me debatin dhe miratimin e çështjeve me rëndësi të lartë politike”, tha zëdhënësi i DBI-së Bujar Osmani.

Në gjashtë muajt e kaluar, Ahmeti dhe Thaçi shumë radhë e kanë parë derën e parlamentit. Ata janë deputetët me më shumë mungesa të arsyeshme në parlament. Sipas Raporti të Parlamentit të publikuar pak ditë më parë deputetët me më shumë mungesa në seanca parlamentare janë Ali Ahmeti dhe Menduh Thaçi me 62 dhe 53 mungesa të arsyeshme. /lajmpress/