Beograd. Deputeti i vetëm shqiptar në Parlamentin e Serbisë, Riza Halimi, ka kërkuar nga Qeveria e Serbisë që pas mendimit të Gjykatës Ndërkombëtare të Drejtësisë, të ndryshojë qasjen ndaj Republikës së Kosovës. Halimi i ka bërë këto komente në seancën e rregullt plenare të Kuvendit të Serbisë. Ai tha me këtë rast se politika e Beogradit në relacion me Kosovën duhet të jetë më racionale, ndërsa sa i përket idesë për negociata të reja Prishtinë-Beograd, Halimi tha se në këtë proces duhet të përfshihet edhe Lugina e Preshevës.

“Pra, në këto bisedime duhet të përfshihen edhe temat jetësore të serbëve të Kosovës dhe të shqiptarëve të Luginës së Preshevës”, tha ai.

“Udhëheqja në Beograd duhet të jetë e gatshme që me Prishtinën të bisedohet për zgjidhjen e problemeve jetësore, konkrete, pa marrë parasysh vendimin e shpallur më 17 shkurt për pavarësinë e Kosovës nga Kuvendi i saj”, tha Halmi. Diskutimi i Halimit ngjalli reagime të ligjvënësit e Partisë Radikale Serbe.