Gjykata Ndërkombëtare e Drejtësisë publikoi një mendim këshillëdhënës më 22 korrik të këtij viti mbi pavarësinë e Kosovës ku u tha se shpallja e saj nuk është në kundërshtim me ligjin ndërkombëtar. Edhe pse mendimi është jo-obligues, ai ka implikime si për Kosovën ashtu edhe për Serbinë, si edhe për vendet dhe lëvizjet secesioniste përreth botës.

David Gowan, i cili shërbeu si ambasador britanik në Serbi dhe Mal të Zi nga 2003 deri më 2006 dhe koordinoi punët britanike për t’i hetuar krimet e luftës në Kosovën në vitin 1999, rëndësinë e mendimit të GJND-së e vlerëson si “moment të mundësisë” për Serbinë e Kosovën.

"Vendimi i GJND-së i jep Serbisë e Kosovës një mundësi për të shikuar përpara”, thotë Gowan, "për tu përqendruar në Bashkimin Evropian, të ecin drejt BE-së, dhe në të vërtetë, të punojnë me njëri-tjetrin”, shkruan ueb-faqja e Këshillit për Politikë të Jashtme.

Ndërsa, John B. Bellinger III, bashkëpunëtor i lartë dhe ekspert i ligjit për siguri kombëtare dhe ndërkombëtare në “Arnold & Porter”, thotë se "vendimi ishte shumë i kufizuar dhe nuk ka qenë befasi sa i përket ligjit ndërkombëtar apo edhe politikës”.

Bellinger nuk e sheh mendimin e GJND-së si precedent që do t’i nxiste grupet tjera të shpallnin pavarësinë, edhe pse ai pret se ky mendim do të sjellë “një numër të konsiderueshëm të njohjeve të reja për Kosovën”.