Prishtinë. Sevdije Gjyrevci, çdo mbrëmje mbyllet me të gjithë anëtarët e familjes në shtëpinë e saj në fshatin Miradi e Poshtme të Fushë-Kosovës.

Dyert dhe dritaret për asnjë çast nuk guxojnë t’i lënë të hapura, ndërsa qëndrimi në kopshtin me bar dhe të rregulluar mirë është pothuajse një “mision i pamundur”.

Kjo mbyllje e familjes Gjyrevci nuk ndodh për shkak të gjakmarrjes, por pikërisht për shkak të erës së rëndë, e cila kundërmon nga lumi Graçanka, që kalon pranë shtëpisë së tyre.

“Jetojmë si në kohë të luftës”

“Çdo natë mbyllemi në shtëpi si në kohë të luftës. Nëse për një çast i hapim dyert, apo dritaret e shtëpisë s’ka gjasë me fjetë gjatë gjithë natës”, tregon ajo. Sevdija sqaron se era e keqe vjen si pasojë e hirrës që derdhet në këtë lumë nga qumështorja “Bylmeti” në fshatin Miradi e Poshtme, i cili lumë kalon edhe në Miradinë e Epërme.

Ajo sqaron se banorëve qëndrimi në shtëpitë e tyre gjatë orëve të mbrëmjes u është bërë i padurueshëm dhe për këtë shkak kanë nënshkruar një peticion me ankesa, të cilin ia kanë dërguar zyrtarëve të Komunës së Fushë-Kosovës. Për vështirësimin e jetës së banorëve të këtij fshati, ajo akuzon direkt kryetarin e Komunës së Fushë-Kosovës, Burim Berishën.

“Si duket komunarët po marrin djathë e qumësht nga pronari i Bylmetit dhe nuk po e pengojnë atë. Por, kjo që po ndodh te ne është marre dhe turp për ta. Nëse komuna nuk merr masa, këtu mund të shpërthejë edhe ndonjë epidemi”, tha ajo.

Ndërsa Ramadan Bullatovci nga fshati Miradi e Poshtme i ka humbur të gjitha shpresat se ky problem do të zgjidhet.

“Ata të Bylmetit, siç po shihet janë më të fortë se Komuna”, shprehet ai. Edhe Hysen Slivova, së bashku me familjen e tij, jeton buzë shtratit të ndotur të këtij lumi. Slivova thotë se në atë shtëpi ka jetuar prej më shumë se gjashtëdhjetë vjet por jetë më të rëndë se tash asnjëherë nuk ka bërë.

“Paramendoni në shtëpinë tende nuk mundesh të jetosh. Erë më të rëndë kurrë kam përjetuar. Sidomos në orët e mbrëmjes është e pamundur të qëndrohet këtu. Ne jemi në hall, kemi kërkuar shumë herë ndihmën e Komunës, por ajo ka munguar. Komuna nuk ka shprehur gatishmëri për të na ndihmuar, ashtu siç patën premtuar gjatë fushatës së fundit zgjedhore”,tha ai.

Në anën tjetër, Afrim Berisha, bashkëpronar në qumështoren “Bylmeti”, thotë se është i vetëdijshëm për problemet që po iu shkaktohen banorëve të fshatit Miradi e Poshtme. Mirëpo, sipas tij, problemi nuk qëndron te “Bylmeti”, por te Komuna.

“Problemi është te Komuna e Fushë-Kosovës. Ata e patën nisur një projekt që ujërat të grumbullohen në një impiant te ferma e derrave në fshat, por a kanë gabuar diçka në projekt, apo ka ndonjë problem tjetër, ujërat nuk mund të dërgohen në atë impiant, prandaj duhet të derdhen në lumë”, shprehet Berisha.

Ai mohon që vetëm fabrika e tij të jetë fajtor për kundërmim të erës së keqe nga lumi, mirëpo, sipas tij, ka edhe ndotës të tjerë.

“Ne e dimë që jemi njëri nga ndotësit e lumit dhe vitin që lamë pas e kemi ndërtuar një impiant, ndërsa në vitin që vjen do ta ndërtojmë edhe një impiant të ri sipas standardeve të BE-së”, tha ai.

Berisha thotë se ka qenë në fshatin Miradi të Poshtme dhe ka vërejtur se atje është një erë e padurueshme, por ai është i bindur se e gjithë era nuk është duke u krijuar nga hedhja në lumë e mbeturinave të qumështores.

“Ka dyshime se era është duke ardhur edhe nga depot e naftës. Ne kemi kërkuar nga Komuna që të behët një hetim më i hollësishëm dhe të dihet saktë se prej nga po vjen ndotja. Absolutisht se faji nuk është vetëm te na. Ne mund të jemi njëri nga ndotësit, por jo ndotësi i vetëm”, tha ai.

Berisha fajëson Berishën

Kryetari i Komunës së Fushë-Kosovës, Burim Berisha thotë se për këtë çështje ka marrë ankesa nga banoret e fshatit Miradi e Poshtme.

Kryetari Berisha thotë se është takuar me pronarin e qumështores “Bylmeti”, Ymer Berishën dhe ky i fundit, sipas tij, është zotuar se do t’i trajtojë ujërat që dalin nga fabrika.

“Era e rëndë në lumin e fshatit vjen direkt nga hedhja e hirrës nga qumështorja “Bylmeti” në orët e mbrëmjes. Zgjidhja e vetme për këtë qumështore është trajtimi më i mirë i ujërave dhe unë besoj se një gjë e tillë do të ndodhë. Unë nuk dua ta marr hapin e fundit që të mbrohen banorët, ose të mbyllet objekti. Këtu një gjë dihet fare mirë se ka shumë ndotje dhe banoret e kanë të vështirë të jetojnë. Besoj se zgjidhja do të bëhet vitin e ardhshëm ”, tha ai.