Propozimi i ministrit të Zhvillimit Ekonomik, i dhënë ditë më parë që Postë-Telekomi i Kosovës (PTK), t’i ulë shpenzimet për 30 për qind, ka dhënë efekte shumë shpejt. Gjatë ditës së premte, menaxhmenti i kësaj kompanie ka marrë një vendim që të ulë pagat e punëtorëve të PTK-së, duke çuar propozimin e Beqajt në vend, e duke e tejkaluar propozimin e tij.

Rreth 7 milionë euro do të ulen pagat e punëtorëve të PTK-së, nga vendimi i marrë nga ky komision i krijuar nga menaxhmenti i PTK-së e që shpenzimet e PTK-së do të bien nën 20 për qind, edhe pse propozimi i Beqajt ishte që shpenzimet e PTK-së të ulen në 20 për qind.

Zëdhënësi i PTK-së, Menduh Abazi, ka thënë se modifikimi apo harmonizimi i pagave në PTK është bërë nga një grup ekspertësh që kanë punuar në realizimin e koeficienteve të rinj, në përputhje me përvojën dhe përgatitjet profesionale të punëtorëve.

Sipas tij, nga ky zvogëlim i pagave ka pësuar menaxhmenti i mesëm, i cili i është nënshtruar këtij harmonizimi të pagave. “Për mbi 6 milionë e 980 mijë euro janë ulur pagat e punëtorëve të PTK-së nga ky vendim. Kjo i bie se tani shpenzimet totale të PTK-së do të bien nën 20 për qind të të hyrave të kompanisë”, ka thënë Abazi, duke shtuar se shpenzimet kanë rënë më shumë sesa kishte propozuar ministri i MZHE-së, Besim Beqaj.

Ai ka thënë se disa punëtorëve u janë rritur pagat, siç janë postierët, punëtorët e sigurimit,

të sportelit etj. “Ulje të pagave apo nivelizim të pagave kanë pësuar një pjesë të cilët kanë qenë me grada të njëjta, por me diferencë në paga”, ka thënë ai.

Kurse në anën tjetër kryetari i Federatës së Sindikatës të PTK-së (FSP), ka kërcënuar se do ta bllokojnë PTK-në. Milazim Alshiqi, kryetar i kësaj sindikate, ka thënë se ky vendim është marrë nga menaxhmenti i PTK-së për ulje të pagave.

Ai ka thënë se sindikata që drejton ai është jashtë kësaj skeme dhe se janë duke pritur reagimet që do të merren nga punëtorët pas uljes së pagave që kanë pësuar. “Gjatë ditës së sotme punëtorëve u është dhënë një vendim për ulje të pagave dhe në bazë të reagimeve të punëtorëve ne do të marrim edhe hapat si sindikatë”, ka thënë ai.

Sipas tij, më së largu të martën do të thirrin kuvendin e sindikatës dhe do të marrin vendime në bazë të pakënaqësive të punëtorëve të PTK-së për shkurtimet e pagave që u janë bërë.

“Për momentin po presim reagimet e punëtorëve. Nuk e përjashtoj mundësinë e bllokimit të PTK-së dhe asnjë vendim tjetër që mund të merret nga kuvendi i sindikatës pasi të mbajmë mbledhjen”, ka thënë Alshiqi.

Shpenzimet ulen për 7 milionë

Menduh Abazi, zëdhënës i PTK-së ka thënë se rreth 7 milionë euro do të ulen shpenzimet e PTK-së. “Për mbi 6 milionë e 980 mijë euro janë ulur pagat e punëtorëve të PTK-së nga ky vendim. Kjo i bie se tani shpenzimet totale të PTK-së do të bien nën 20 për qind të të hyrave të kompanisë”, ka thënë Abazi.

Ndërsa Alshiqi ka kërcënuar me bllokim të PTK-së, nëse kërkohet nga punëtorët. “Për momentin po presim reagimet e punëtorëve. Nuk e përjashtoj mundësinë e bllokimit të PTK-së dhe asnjë vendim tjetër që mund të merret nga kuvendi i sindikatës pasi të mbajmë mbledhjen”, ka thënë Alshiqi.