(E plotësuar) Menaxhmenti i Postë-Telekomit të Kosovës (PTK), të premten e kaluar, ishte kujdesur që pagat për 20 për qind t’ia zvogëlojë vetëm rreth gjysmës së punëtorëve të kompanisë, ndërsa për gjysmën tjetër, ku përfshiheshin njerëzit me ndikim tek partitë e koalicionit qeverisës dhe për menaxhmentin, nuk parashihej kurrfarë zvogëlimi, madje planifikohej ngritje e pagave.

Sipas vendimit të javës së kaluar, pagat do t’u zvogëloheshin 1400 punëtorëve, 1600 të tjerëve do t’u mbeteshin të njëjta, ndërsa rreth 300 punëtorëve do t’u ngriheshin.

Burimet e gazetës “Zëri” thonë se në listën e punëtorëve për moszvogëlim të pagave, apo për ngritje të tyre, ishin përfshirë punëtorë të PTK-së, të cilët janë anëtarë të partisë më të madhe në vend (Partisë Demokratike të Kosovës), të kryemistrit Hashim Thaçi.

Ky vendim i menaxhmentit si duket është kundërshtuar fuqishëm nga punëtorët që kanë qenë në listë për zvogëlim pagash, prandaj, ushtruesi i detyrës së kryeshefit ekzekutiv në PTK, Nuredin Krasniqi, të hënën pasdite e ka dërguar një e-mail intern për stafin e brendshëm, të cilëve u ka bërë me dije se të gjithë punëtorëve do t’u ulen pagat, duke e përfshirë edhe pagën e kryeshefit ekzekutiv.

“Menaxhmenti ekzekutiv rikonfirmon se harmonizimi i gradimeve është efektiv për secilën pozitë në hierarkinë e korporatës duke filluar nga kryeshefi ekzekutiv e deri te niveli operativ. Kjo nënkupton se edhe stafi drejtues i PTK-së në kuadër të këtij harmonizimi ka zbritur shkallën e pagesës për 1 gradë”, thuhet në njoftimin e kryeshefit Krasniqi, të cilin e ka siguruar edhe gazeta “Zëri”.

Për mundësinë e zvogëlimit të pagave për punëtorët e Postë Telekomit të Kosovës (PTK) muaj më parë ka shkruar gazeta “Zëri”, të cilën gjë fillimisht e kishin mohuar në PTK, ku këto të fundit pohonin se për punëtorët e tyre nuk do të ketë zvogëlim pagash, por përkundrazi do të ketë ngritje.

Pas kësaj edhe ministri i Zhvillimit Ekonomik, Besim Beqaj, kishte njoftuar se do të ulen pagat për punëtorët e kompanisë.

Në fakt, sipas burimeve të “Zërit”, vendimi për uljen e pagave të PTK-së nga ekzekutivi i vendit dhe përfaqësuesit e kësaj të fundit në bordin e ndërmarrjes publike, ka ardhur pas kërkesës së operatorëve të huaj, të cilët kanë kërkuar që punëtorëve t’u zvogëlohen pagat për 20 për qind, me kusht që të konkurrojnë në tender për privatizim të kompanisë që pritet të ndodhë këtë vit.

Kjo pasi që vitin e kaluar ka dështuar tenderi për privatizimin e PTK-së si pasojë e tërheqjes nga gara të telekomit kroat, i cili vendimin për tërheqje e kishte marrë me arsyetimin se drejtuesit e lartë të PTK-së janë nën hetime të EULEX-it për korrupsion.

Një kërkesë të tillë të blerësve potencialë për zvogëlim pagash jozyrtarisht e kanë konfirmuar edhe zyrtarët e lartë në PTK.

Në anën tjetër, zëdhënësi i PTK-së, Menduh Abazi, ka thënë për “Zërin” se ndryshimi në të ardhura personale është edhe rekomandim i aksionarit që paga bruto, nuk guxon të tejkalojë 20 për qind të të hyrave bruto vjetore të planifikuara.

Megjithatë, sipas tij, nëse stafi tregon performancë të mirë dhe arrihet targeti i të hyrave të parapara me plan, atëherë edhe do të ketë shperblim-rritje të të ardhurave personale në proporcion me realizimin. Nga ky vendim për zvogëlim pagash, PTK-ja pritet t’i kursejë 6.5 -7 milionë euro.

Mbeten edhe pa beneficione

Përveç zvogëlimit të pagave, punëtorët e PTK-së prej fillimit të këtij viti kanë mbetur edhe pa shërbime private shëndetësore, të cilën më herët ia kishte paguar PTK-ja dhe pa 5 për qind kontribute në Trustin e Kursimeve Pensionale të Kosovës (PTK).

Derisa të gjitha kompanitë në Trust kishin paguar për punëtorët 5 për qind, deri në fund të vitit të kaluar PTK kishte paguar për punëtorët e vet 10 për qind të pagës, plus 5 për qind kishin kontribuar vetë punëtorët. Ndërsa prej fillimit të vitit 2012 PTK-ja do të paguajë në Trust vetëm 5 për qind të pagës së punëtorëve.