Furnizimi me energji elektrike vazhdon të jetë stabil përkundër temperaturave të ulëta, në të cilat po kalon Kosova. Aktualisht mbi 1300 megavat orë energji elektrike ka rritur kërkesa për konsum të energjisë elektrike. Ndërkaq, prodhimi së bashku me importin në kohë piku kanë arritur deri në 1100 megavat.

Zëdhënësi i Korporatës Energjetike të Kosovës, Viktor Buzhala thotë se situata e furnizimit me energji është tejet stabile duke pasur parasysh motin e ftoftë në të cilin po kalon vendi ynë.

Zëdhënësi Buzhala thotë se kërkesa për konsum në disa raste ka tejkaluar 1300 megavat orë energji elektrike. Ai tha se KEK-u në vazhdimësi është duke i prodhuar rreth 800 megavat orë energji, ndërkaq në disa raste është duke importuar deri në 200 megavat orë energji elektrike.

“Situata është shumë stabile dhe furnizimi është shumë stabil, sepse të gjitha njësitë e KEK-ut janë në gjendje gatishmërie gjatë 24 orëve. Aktualisht qytetarët që gjenden në kategorinë A dhe B janë duke u furnizuar 24 orë pa ndërprerë me energji elektrike. Ndërkaq, për momentin reduktime ka vetëm për qytetarët që gjenden në kategorinë C”, tha ai.

Sipas tij, nëse KEK-ut nuk i shfaqet ndonjë problem në prodhim, furnizimi me energji elektrike edhe më tej do të jetë i qëndrueshëm. Ai tha se reduktime për kategorinë A mund të aplikohen vetëm në raste të ndonjë avarie në KEK.

Të hënën Korporatën Energjetike të Kosovës e ka vizituar edhe ministri i Zhvillimit Ekonomik, Besim Beqaj. Ai ka thënë se Korporata është një situatë emergjente dhe vërehet një angazhim i të gjithë stafit.

“Unë vizitova edhe mihjen dhe është një sfidë relativisht e madhe të mbahet me furnizim edhe mihja, dhe të funksionojnë të gjitha blloqet e prodhimit të energjisë në këto kushte. Unë falënderoj punëtorët e KEK-ut, të cilët me angazhim jashtëzakonisht të theksuar kanë mundësuar që këto ditë të kemi furnizim relativisht të mirë me energji elektrike”, tha Beqaj.

Kreu i MZHE-së ka falënderuar të gjithë punëtorët që në këto kushte jashtëzakonisht të rënda pune po gjejnë motivim që kjo korporatë të funksionojë ashtu si duhet, ndërsa apeloi për konsum sa më racional që energjia të shkojë në të gjitha anët e Kosovës pa dallim nëse ata janë në zona urbane apo rurale.

“Dua të konfirmoj edhe një vendim të Qeverisë që sot është marrë, e ai është që ato zona që janë banime të përkohshme siç është lagja e Kuvajtit dhe të ngjashme të kenë furnizim 24 orë, ndërsa Qeveria do të merret me të gjitha përgjegjësitë dhe obligimet që ka ndaj KEK-ut”, ka thënë ai.

Ndërsa drejtori menaxhues i KEK-ut, Arben Gjukaj, ka bërë të ditur se Korporata që nga enjtja është duke punuar në kushte emergjente dhe kushtet në të cilat punojnë punëtorët janë tejet të vështira, por është duke u bërë maksimumi duk punuar me dy njësi të TC Kosova B dhe dy njësi të TC Kosova A që prodhojnë rreth 800 megavat/orë.