Pas publikimit të raportit "Zhvillimi dhe vlerësimi i opsioneve të furnizimit me energji elektrike për Kosovën", nga Banka Botërore, i cili vlerëson se Kosova për shkak të kostos më të ulët duhet të shftytëzojë kapacitetet e saj të linjitit për të prodhuar energji, ka reaguar instituti vendor për politika zhvillimore INDEP, duke thënë se raporti i BB-së dështon që të japë vlerësim të saktë mbi opsionin me kosto më të ulët për Kosovë.

Në reagimin e saj INDEP thotë se “kjo analizë plotësuese e porositur nga Banka Botërore vlerëson opsionet e furnizimit me energji elektrike të paraqitura më parë. Në këtë dokument janë përmirësuar disa supozime tejet të gabuara: tani njihet nevoja për diversifikim të kapaciteteve gjeneruese të energjisë, konfirmohet prezenca e një potenciali domethënës për kapacitete gjeneruese të energjisë së pastër, dhe theksohet nevoja për të reduktuar humbjet dhe të investuarit në efiçiencën e energjisë. Megjithatë, raporti akoma dështon për të dhënë një vlerësim të saktë mbi opsionin me kosto më të ulët për Kosovën”.

Derisa Banka Botërore ka numëruar arsyet pse Kosova duhet të prodhojë energji me linjitin që posedon. Në raportin e saj të hartuar nga ekipi i firmës së konsulencës “DHInfrastructure”, dhe i rishikuar nga punonjësit e Bankës Botërore përfshin shqyrtimin e ndikimeve mjedisore, të ndërlidhura me secilin opsion, dhe shqyrton disa kombinime të alternativave energjetike për plotësimin e kërkesave të ndryshueshme ditore dhe stinore. “Kosova varet shumë nga importi për të përmbushur nevojat e larta sezonale dhe ato ditore.

BB-ja përmend linjën e re e transmisionit prej 400 KV për në Shqipër, i cili pritet të komisionohet deri në fund të vitit 2013, një lidhje të re prej 400 KV me Maqedoninë, e cila do të rrisë kapacitetin e bartjes për 500 MW shtesë në të dyja drejtimet. Sa i përket kombinimit më të mirë të prodhimit të energjisë elektrike për Kosovën, thuhet se për një kombinim të kapacitetit për ngarkesën bazë të shfrytëzimit të energjisë elektrike si dhe për nivelet maksimale të shfrytëzimit të energjisë elektrike me qëllim të plotësimit të kërkesës në mënyrë të vazhdueshme dhe me kosto më të ulët.

“Kjo patjetër nënkupton se Kosova ka nevojë për një kombinim të opsioneve të furnizimit të cekura më lart – edhe termocentralet edhe burimet e energjisë së ripërtëritshme – dhe jo vetëm për një opsion të vetëm”, shkruan në raport.

Sipas INDEP, raporti i BB-së, dështon të dëshmojë nevojën për një termocentral të ri të bazuar në thëngjill: Raporti gabimisht arrin te përfundimi që kapaciteti gjenerues i mbi 1.200 MW të ngarkesës bazë duhet të vihet në funksion para se të konstatohen nevojat e ngarkesës përcjellëse dhe ngarkesës kulmore (pikut), reduktimi në nivele të arsyeshme i humbjeve të tanishme teknike në shpërndarje dhe vjedhjeve, si dhe vlerësimi dhe zbatimi i mundësive për eficencë të rritur te shfrytëzuesit.