Menaxhimi i fondit të privatizimit prej 600 milionë eurosh nga institucionet kosovare, ka shtyrë ministrin e Jashtëm të Serbisë, Vuk Jeremiq, që t’i drejtohet me ankesë shefit të Organizatës së Kombeve të Bashkuara (OKB), Ban Ki Moon.

Jeremiq, gjatë një takimi javën e kaluar me Ki-Moon dhe disa ambasadorë në Këshillin e Sigurimit, ka kërkuar nga këta të fundit, që siç ka thënë ai, ta mbajë këtë fond larg autoriteteve të Prishtinës, madje duke iu sugjeruar bllokimin e këtij fondi.

“Paratë duhet të mbesin larg nga institucionet e Prishtinës. Ekziston një organizatë e quajtur Agjencia Kosovare e Privatizimit, e cila pretendon se është pasardhëse e AKM-së, që nuk është e vërtetë. Në emër të Serbisë, e cila është anëtare e OKB-së, kërkoj që fondet të bllokohen”, ka thënë Jeremiq, citojnë mediet serbe.

Nga ana tjetër, drejtuesit e Agjencisë Kosovare të Privatizimit (AKP) thonë se ish-AKM-ja më herët ia ka transferuar fondin e privatizimit.

“AKM-ja i ka bartur më herët mjetet në llogari të AKP-së dhe mjetet janë në kompetencë të kësaj të fundit”, thekson për “Zërin” Shkelzen Lluka, drejtor menaxhues i Agjencisë Kosovare të Privatizimit (AKP).

Lluka këmbëngul se Serbia nuk mund t’i bllokojë këto mjete, pasi që përgjegjëse për mjetet, sipas Kushtetutës së Republikës së Kosovës, janë institucionet vendore.

Fondi i Privatizimit prej 600 milionë eurosh ruhet për t’i kompensuar kreditorët eventualë nga shitja e ndërmarrjeve shoqërore gjatë procesit të privatizimit dhe mjetet që mbesin nga ky fond parashihet të transferohen në buxhetin e Kosovës.

Në bazë të ligjeve që kanë qenë më herët në fuqi, procesi i likuidimit të ndërmarrjeve shoqërore ishte paraparë të zgjasë prej 30-35 vjet, mirëpo, me ndryshimet e bëra në legjislacionin në fuqi, Lluka shpreson se procesi i likuidimit do të përfundojë për 4-5 vjetët e ardhshme.

Deri më tani procesi i likuidimit ka përfunduar për 3 ndërmarrje të vogla, mirëpo mjetet nga shitja e tyre ende nuk është transferuar në buxhetin e vendit, pasi që pritet vendimi i Odës së Veçantë të Gjykatës Supreme të Kosovës.

Agjencia Kosovare e Privatizimit është themeluar si një organ i pavarur publik, i cili i ushtron funksionet dhe përgjegjësitë në mënyrë plotësisht të pavarur, në bazë Ligjit të Kuvendit të Kosovës, Nr. 04/L-034, mbi AKP-në.

Sipas ligjit, AKP ka zotësi të plotë juridike, posaçërisht për të bërë kontrata, për të marrë, mbajtur ose shitur pronën, si dhe ka të gjitha kompetencat e vetëkuptueshme për përmbushjen në tërësi të detyrave dhe kompetencave të dhëna me këtë ligj; si dhe të padisë e të paditet në emër të saj.

AKP themelohet si pasardhëse e Agjencisë Kosovare të Mirëbesimit, të rregulluar në bazë të Rregullores së UNMIK-ut 2002/12 “Mbi Themelimin e Agjencisë Kosovare të Mirëbesimit”, me ndryshime, dhe të gjitha asetet dhe përgjegjësitë e saj do të jenë asete dhe përgjegjësi të AKP-së.