Tarifa e re e sigurimeve, e propozuar nga Shoqata e Sigurimeve të Kosovës, për veturat me targa të Serbisë, që dëshirojnë të hyjnë në Kosovë, konsiderohet si tejet e lartë dhe e dëmshme, kryesisht për qytetarët shqiptarë qqë jetojnë në Luginën e Preshevës.

Tarifa e re, e propozuar nga Shoqata, për 14 ditë do të jetë 32 euro, e njëjtë me ato të mërgimtareve nga Evropa.

Rrahim Pacolli, kryetar i Shoqatës së Sigurimeve të Kosovës, thotë për “Zërin” se pala kosovare ka bërë propozimin për tarifa të reja të sigurimeve në Kosovë, ku do të jenë të njëjta me ato të Evropës.

Sipas propozimit të palës kosovare, polica e sigurimeve për 14 ditë qëndrimi në Kosovës, do të paguhet 32 euro, krahas 60 euro sa është aktualisht. Tarifa e propozuar do të jetë e njëjtë më ato të mërgimtareve nga Evropa.

Pacolli thotë se vendimi për vendosje të tarifave ka qenë i mirëseardhur për kompanitë e sigurimeve.

Nga ana tjetër, përfaqësues të shqiptareve të Luginës së Preshevës thonë se vendimi për vendosje të tarifave ka qenë shumë i dëmshëm për shqiptarët e asaj ane.

Galip Beqiri, kryetar i Këshillit Nacional të Shqiptareve të Luginës së Preshevës, thotë se edhe tarifa e re prej 32 eurosh për 14 ditë është e papranueshme për shqiptaret e Luginës. Sipas tij, tarifa është shumë e lartë dhe e papërballueshme për pjesën dërrmuese të qytetareve që jetojnë në atë anë të kufirit.

“Ne para pakë kohës jemi takuar me zëvendëskryeministren e Kosovës, Edita Tahiri. Nga ajo kemi kërkuar që tarifa të hiqet krejt dhe ajo na ka premtuar se do të angazhohet në atë drejtim”, tha ai.

Beqiri thotë se nga vendosja e tarifës së sigurimeve, shqiptarët e Luginës janë izoluar krejtësisht.

Ai tha se një tarifë e tillë ka dëmtuar edhe ekonomikisht Luginën e Preshevës, por edhe rrethinën e Gjilanit.

“Të gjithë shqiptarët e Luginës, por edhe një pjesë e serbëve të Vrajës ushqimin e kanë blerë nëpër depo të Gjilanit”, tha ai.

Kryetari Beqiri thotë se edhe Qeveria e Kosovës duhet të bëjë një zgjidhje për shqiptarët e Luginës, njëjtë sikurse pati vepruar më herët Qeveria e Shqipërisë. “Shqipëria ka aplikuar viza për qytetarët serbë deri në vitin 2010. Por, një vendim i tillë nuk ka vlejtur edhe për qytetarët shqiptarë që jetojnë në Serbi, ata kanë qenë të liruar. Në të njëjtën mënyrë mund të veprojë edhe Qeveria e Kosovës të bëjë lëshime për qytetaret e Luginës”, tha ai, duke shtuar se kjo kërkesë është e arsyeshme kur dihet se serbët e Kosovës me targa të vjetra të ish-Jugosllavisë (PR,GL,..) janë të liruar nga pagesa e këtyre policave.

Përndryshe, tarifa e sigurimeve mes Kosovës dhe Serbisë është vendosur që nga 26 dhjetori i vitit të kaluar.

Për të udhëtuar me targa të Serbisë në Kosovë për 14 ditë qëndrimi duhet të paguhen 60 euro. Ndërkaq, për të kaluar me targa të Republikës së Kosovës në Serbi, qytetari duhet të paguajë 105 euro për 1 muaj qëndrim.

Ndërkaq, qytetarët serbë që ecin me vetura me targa të vjetra nuk paguajnë asnjë euro si për të hyrë në Kosovë, por edhe në Serbi.

Tarifa afatgjata

Por, burime të besueshme të gazetës “Zëri” thonë se çështja e diskutimit të policave kufitare mes Kosovës dhe Serbisë, mund të zvarritet edhe më tej, pasi që kjo çështje nuk është në rend në ditës gjatë diskutimeve që do të mbahen në ditët në vijim mes palës serbe dhe asaj shqiptare.

Por, pengesë për zgjidhjen e kësaj çështjeje, mund të jenë edhe zgjedhjet parlamentare në Serbi, që do të mbahen në maj të këtij viti.

“Mund të ndodhë që tarifat ekzistuese të mbesin në fuqi, së paku edhe tre muaj tjerë, nëse pala kosovare nuk bën presion mbi palën serbe”, tha burimi i besueshëm i gazetës.