Kërkesa e Korporatës Energjetike të Kosovës për shtrenjtimin energjisë elektrike në masën 23 për qind, është e kuptueshme vetëm në kuadër të kornizave bilancore të KEK-ut, mirëpo, miratimi i saj do të paraqet ngarkesë të madhe për konsumatorët dhe njëkohësisht mund të jetë gjenerator i inflacionit, i cili edhe ashtu është në rritje, vlerëson organizata joqeveritare STRAS

Norma e rritjes të cilën e kërkon KEK-u – sipas STRAS – nuk buron nga ambienti ekonomik, e as nga trendet inflatore në vend. “Ajo vjen pas trysnisë së shpenzimeve operative që sivjet duhet t’i bëjë KEK-u. Ato janë në përputhje me të hyrat prej 239 milionë euro, apo 23 për qind më të larta, përkatësisht 45 milionë euro”, vlerëson STRAS.

Duke pasur parasysh edhe rregullat e reja për llogaritjen e tarifave, për shtrenjtimin e energjisë elektrike, sipas STRAS, ndikim më të madh ka kostoja e importit të e energjisë në një shumë prej 44 milionë eurosh. Sipas kësaj organizate, paratë duhet të sigurohen nga të hyrat e KEK-ut, së paku 21 milionë euro, dhe si subvencion nga Qeveria e Kosovës, i cili është 50 për qind më i ulët se në vitin 2010.

“Në të njëjtën kohë prapa kësaj kërkese qëndron insistimi i kësaj korporate që me çmime të rritura të mbuloj performancën e dobët. Sa do që nuk mund të mohohen të arriturat e shënuara viteve të fundit, kur humbjet u zvogëluan 11 për qind, megjithatë këtu ende qëndrojnë potenciale të mëdha financiare. Kjo është e qartë kur përmendet se kërkesat e KEK-ut nga konsumatorët sillen rreth 400 milionë euro, kurse 40 për qind e energjisë humbet”, thekson STRAS.

Për zvogëlimin humbjeve teknike, të cilat aktualisht janë 16,6 për qind, duhen investime, mirëpo është krejtësisht reale të kërkohet zvogëlimi i humbjeve komerciale, theksohet nw komunikatë.

“Për këtë duhet mobilizim i shumë institucioneve shtetërore,në të njëjtën kohë edhe një qasje shumë më e përgjegjshme dhe me profesionale e punëtorëve të KEK-ut. Ata nuk duhet të dorëzohen përballë presioneve të ndryshme për fshirjen e borxheve, ndërsa korporata të përforcoj mekanizimin kontrollues dhe ndëshkues për parandalimin e keqpërdorimeve dhe të mitëmarrjes nga punëtorët e saj ën teren”.

Me masa të këtilla, sikur të arrihet që të arkëtohen 10 për qind të shumës së borxhit, atëherë, sipas STRAS-it, KEK-u siguron gati të gjitha paratë e kërkuara përmes rritjes së tarifave.

“Shtrenjtimi i energjisë elektrike nuk duhet të ndodhë as për faktin se çmimi i saj është më i ulëti krahasuar me shtet e rajonit. Një kilovat orë energji elektrike në Kosovë është 44 për qind në lirë se në Shqipëri, pastaj me Bosnjën – 10 për qind; Bullgarinë -30,3 për qind; Kroacinë – 49,7 për qind; Maqedoninë – 28 për qind; Malin e Zi- 16,5 për qind; Rumaninë – 37,6 për qind dhe Serbinë – 16,1 për qind. Por, kur bëhen këto krahasime duhet pasur parasysh se Kosova ka nivelin më të lartë të varfërisë dhe të papunësisë në krahasim me shtetet e përmendura, ndërsa GDP-ja e saj për kokë banori është 2,5 herë më e ulët se në Shqipëri e në Bosnjë e Hercegovinë, apo gati katër herë më e ulët se në Mal të Zi”, thekson STRAS.

Kjo, sipas kësaj organizate, dëshmon se moment social në të cilin gjendet Kosova nuk arsyeton në asnjë mënyrë shtrenjtimin e energjisë elektrike 23 për qind. Për më keq, një rritje e këtillë do të ishte nxiste një cikël të ri të shtrenjtimit të prodhimeve dhe shërbimeve vendore.

Duke u bazuar në të gjitha faktet e përmendura STRAS kërkon: Që Zyra e Rregullatorit të Energjisë gjatë shqyrtimit të kërkesës së KEK-ut të analizoj deri në detaje momentin social në të cilin është vendi; Të insistoj që nevojat të KEK-ut për para shtesë të mbulohen nga rritja e arkëtimit të borxheve të vjetra dhe zvogëlimit të humbjeve; Që Qeveria e Kosovës të kërkoj mobilizim të të gjitha institucioneve që mund të ndihmojnë KEK-un për arkëtimin e borxheve; Po ashtu Qeveria e Kosovës të kërkoj nga KEK-u dhe nga ZRRE-ja që për muajt me temperature polare të ngrisë limitin e sasisë së energjisë së lejuar për konsum për familjet në asistencë sociale, së paku 50 për qind. /Zëri/