Ushtruesi i detyrës së kryeshefit ekzekutiv të Postë Telekomit të Kosovës (PTK), Nuredin Krasniqi, është kujdesur t’i qetësojë me bonuse financiare punëtorët e kompanisë, përderisa i ka njoftuar këta të fundit se prej muajit të ardhshëm pagat e tyre do të zvogëlohen.

Lajmi për zvogëlimin e pagave të punëtorëve të PTK-së i ka revoltuar shumë punëtorë të kompanisë publike. Sipas burimeve të gazetës “Zëri”, ditë më parë Postë Telekomi i Kosovës (PTK) i ka paguar mbi 2 milionë euro në emër të bonuseve për punëtorët e kompanisë ku përpos pagës së janarit punëtorët e kësaj kompanie në muajin shkurt i kanë marrë rreth 70 për qind të pagës së tyre në emër të bonuseve.

Si zakonisht nga ndarja e bonuseve, më së shumti kanë përfi tuar menaxherët kryesorë, të

cilët kanë paga më të larta. “ Çdo punëtor i ka marrë rreth 70 për qind të pagës në emër të bonuseve. Më së shumti para bonus kanë marrë ata që i kanë pagat më të larta në Postë Telekomin e Kosovës”, pohon ky burim i gazetës, i cili preferon të flasë në kushte anonimiteti.

Pavarësisht pagave më të larta që i kanë deri më tani, shumë më të larta sesa shërbyesit e tjerë publikë në vend, punëtorët e PTK-së vazhdimisht janë shpërblyer me bonuse të majme nga menaxhmenti me vendim të Bordit të Drejtorëve.

Për suksesin e arritur financiar të kompanisë, siç ishte thënë, menaxhmenti vitin e kaluar i kishte ndarë po ashtu mbi 2 milionë euro në emër të bonuseve për 6-mujorin e parë të vitit të kaluar, përderisa për pjesën e dytë të vitit 2011 bonuset janë paguar në muajin aktual.

“Bonuset po na këndellin financiarisht. Vitin e kaluar bonuset ma patën ngritur dukshëm bilancin bankar”, tregonte muajin e kaluar një punëtor i PTK-së, derisa ankohej se pjesa e dytë e bonusit të vitit të kaluar ende nuk është paguar.

Në lidhje me ndarjen e bonuseve për punëtorët e kompanisë publike, gazeta “Zëri” të hënën paradite u ka dërguar pyetje zyrtarëve të PTK-së, të cilët kanë premtuar se do të përgjigjen gjatë ditës.

Mirëpo, njëri nga zyrtarët për informim të kompanisë rreth orës 16:00 të së hënës, në fund të orarit të punës, ka njoftuar se nuk mund të përgjigjen të hënën, me arsyetimin se disa anëtarë të familjes kanë probleme shëndetësore, duke thënë se përgjigjet do t’i dërgojnë gjatë ditës së martë (sot).

Postë Telekomi i Kosovës gjatë vitit shpenzon rreth 40 milionë euro për pagat e mbi 3500 punëtorëve të kompanisë, përderisa së fundi është vendosur që secilit punëtor prej muajit të ardhshëm t’i ulet pagat për një gradë, nga i cili vendim shpresojnë t’i kursejnë rreth 7 milionë euro në vit.

Përveç zvogëlimit të pagave, punëtorët e PTK-së prej fillimit të këtij viti kanë mbetur edhe pa shërbime private shëndetësore, të cilën më herët ia kishte paguar PTK-ja dhe pa 5

për qind kontribute në Trustin e Kursimeve Pensionale të Kosovës (PTK).

Derisa të gjitha kompanitë në Trust kishin paguar për punëtorët 5 për qind, deri në fund të vitit të kaluar PTK kishte paguar për punëtorët e vet 10 për qind të pagës, plus 5 për qind kishin kontribuar vetë punëtorët. Ndërsa prej fillimit të vitit 2012 PTK-ja do të paguajë në Trust vetëm 5 për qind të pagës së punëtorëve.

PTK-ja për rreth 3500 punëtorë vetëm për paga në vit paguan rreth 40 milionë euro, apo 10 për qind e shpenzimeve të përgjithshme për paga që paguajnë institucionet qendrore dhe lokale për mbi 80 mijë shërbyes civilë.

Derisa PTK-ja për 3500 punëtorë i paguan rreth 40 milionë euro në vit për paga, institucionet buxhetore të vendit me këto para i paguajnë pagat vjetore për rreth 10 mijë shërbyes civilë.