Ministri i Infrastrukturës, Fehmi Mujota, mbajti të martën një konferencë me gazetarë, me ç’rast i informoi ata lidhur me gjendjen e rrugëve magjistrale dhe rajonale të Kosovës, që janë kompetencë e ministrisë që ai drejton, pas reshjeve të borës së këtyre ditëve, që shkaktuan probleme të shumta.

Mujota tha se që nga fillimi i të reshurave të borës e deri sot rrugët magjistrale dhe rajonale në Republikën e Kosovës në vazhdimësi kanë qenë të kalueshme.

“Bazuar në sasinë e të reshurave dhe kushteve të përgjithshme, Republika e Kosovës është përballur me sukses, madje me sukses më të madh se të gjitha vendet e rajonit”, ka theksuar ai.

Rrugët magjistrale dhe rajonale në gjatësi rreth 2 mijë kilometra, që janë përgjegjësi të Ministrisë së Infrastrukturës, sipas raporteve zyrtare, janë të kalueshme.

Po kështu, gjatë tërë kohës së kushteve të vështirësive që kanë mbretëruar gjatë kësaj kohe, mund të themi se autostrada Vërmicë-Therandë është mirëmbajtur me rregull.

“Vlen të përmendim se shumica e rrugëve drejt vendkalimeve kufi tare janë të kalueshme, me përjashtim të pikës kufitare Pejë-Kullë-Rozhajë, meqë pjesa nga Mali i Zi është e pakalueshme, ndërsa nga pjesa e Republikës së Kosovës rruga është e kalueshme”, ka pohuar Mujota.

Gjatë kësaj kohë Ministria nëpërmjet kompanive për mirëmbajtjen e rrugëve ka ndihmuar disa lokalitete në komuna të caktuara të vendit, me kërkesë të autoriteteve lokale, siç ishte rasti me Novobërdën, Dragashin, Gjakovën në Dushkajë, ndërsa me kërkesë të autoriteteve lokale të Bajram Currit kemi ndihmuar hapjen e aksit rrugor Qafë Morinë-Tropojë në Shqipëri.

“Për hir të informimit të opinionit duhet të themi se kostoja e mirëmbajtjes verore dhe dimërore në Republikën e Kosovës, për rrugët magjistrale dhe rajonale është diçka më tepër se 9 milionë euro”, ka thënë Mujota.