Reduktimet e ashpra energjetike kanë bërë që të dëmtohen prodhuesit vendorë, për shkak të ndërprerjeve të papritura të rrymës. Ata janë ankuar se pos lëndës së parë rrezikohet t’u dëmtohet edhe makineria.

Kreu i Aleancës Kosovare të Biznesit, (AKB) Agim Shahini, ka njoftuar se prodhuesit vendorë janë të shqetësuar me këtë politikë të Korporatës Energjetike të Kosovës (KEK) ndaj së cilës kërkojnë që së paku te ketë paralajmërim apo një orar të sigurt se kur do të ketë ndërprerje të furnizimit me energji.

“KEK-u duhet që paraprakisht t’i njoftojë bizneset për ndërprerje të energjisë, që ata të kenë mundësi të ndalin prodhimin vetë, e jo të dëmtohen nga ndërprerjet e papritura”, ka thënë Shahini.

Sipas tij, tani shumica e prodhuesve kanë teknologji të sofistikuar dhe se ndërprerjet e energjisë, përveç dëmeve në lëndën e parë që mund t’u ngrihet apo t’u prishet, rrezikon edhe me dëmtim të makinerive që kanë për prodhim.

“Ndërprerja e energjisë pa paralajmërim, shkakton prishjen e lëndës së parë, e cila gjendet në prodhim. Prandaj dëmet janë shumë të mëdha nga ndërprerjet”, ka thënë Shahini.

Zyrtarët e KEK-ut kanë bërë me dije se janë një kategori e bizneseve që janë të priviligjuara nga reduktimet, ata paguajnë paraprakisht një shumë të të hollave të cilët automatikisht kategorizohen në grupin A+. Me këtë kategori KEK-u ka një marrëveshje, të cilët edhe nëse ka reduktime i njofton paraprakisht.

Disa ditë pas reshjeve të mëdha të borës, kryetari i OEK-ut, Safet Gërxhaliu, ka vizituar rajonin e Pejës dhe disa ndërmarrje të këtij rajoni që pësuan dëme materiale pas të reshurave të javëve të fundit të borës që kapluan Kosovën.

Gjatë vizitës, Gërxhaliu vizitoi ndërmarrjen “Merkom”, e cila ka pësuar dëme këto ditë nga moti i keq. Kjo ndërmarrje përveç rrënimit të hallave, dëme kishin pësuar edhe pajisjet që gjendeshin në ato halla dhe disa vetura e mjete transportuese.

Pësime nga bora ka pasur edhe fabrika e përpunimit të qumështit, lëngjeve të pijes, kafesë dhe sfungjerëve “Devolli Group” ku pothuajse i tërë kati i katërt ishte i rrënuar.

Fabrikës së birrës “Birra Peja” i janë dëmtuar afër 500 m2 të rrënuara dhe nën këto rrënime gjendej edhe një numër bukur i madh i veturave, disa të transportit të udhëtarëve, disa të transportit të mallrave dhe pajisjeve tjera ndihmëse. Në Pejë dëmtime materiale ka pasur edhe ELKOS Group.

Gërxhaliu ka thënë se është i impresionuar me gatishmërinë e të gjithëve për t’u ballafaquar me pasojat e motit të ligë. Ai ka thënë se është koha kur edhe institucionet vendore dhe ato ndërkombëtare duhet të bëjnë më tepër për t’u dalë në ndihmë këtyre bizneseve.