Bllokimi i paralajmëruar nga Serbisa, për moslejimin e kalimit transit të energjisë nëpër rrjetin e transmisionit të tyre, vartë reduktimet që do të aplikojë KEK-u ndaj konsumatorëve të saj.

Ndërkohë që me vite të tëra në emër të Kosovës, Serbia pikërisht për këtë rrejt merr miliona euro. Derisa Operatori i Sistemit të Transmisionit dhe Tregut (KOSTT) që nga vitit 2008 ka dorëzuar ankesë në Sekretariatin e Komunitetit të Energjisë për Evropën Juglindore (SKE) për shkelje të Traktatit të Komunitetit të Energjisë për EJL nga ana e Serbisë, dhe ende nuk është marrë asnjë masë ndaj saj.

Zana Bajrami-Rama, zëdhënëse në KOSTT, tha se pas kësaj ankese tek në shtator të vitit 2010, SKE hapi procedurën e kontestit ndaj Serbisë për shkelje të dispozitave të traktatit.

”Tani në fillim të tetorit 2011 SKE ka dorëzuar ‘Mendimin e bazuar’ në të cilin konkludon se Republika e Serbisë, përmes EMS (OST e Serbisë) ka dështuar të respektojë nenet 3 dhe 6 të Rregullores së KE-së për kushtet e qasjes në rrjet për shkëmbimet ndërkufitare të energjisë elektrike”, ka thënë ajo.

Ajo ka shtuar se Sekretariati i Komunitetit të Energjisë për Evropën Juglindore, i ka dhënë Serbisë afat 2 muaj që të korrigjojë shkeljet e identifikuara.

”Sipas Aktit Procedural të SKE, varësisht nga përgjigjja apo mospërgjigja e Serbisë, SKE mund ta dërgojë kërkesën me propozimin për vendim në Këshillin e Ministrave si organ vendimarrës”, ka thënë ajo.

Ekspertë energjetikë vlerësojnë se energjetika në vend ka vite që ka stagnuar dhe nuk ka shënuar progres, ndërsa në të njëjtën kohë, operatorët serbë kanë përfituar miliona nga rrjeti i transmisionit kosovar. Avni Kurshumliu, ekspert energjetik, ka thënë se komiteti për energjetikë i Bashkimit Evropian ka prurë një vendim, ku ka theksuar se rrjeti i Kosovës të jetë i pavarur.

Ai ka thënë se KOSTT-i duhet tani të veprojë për ta realizuar këtë çështje, pasi që këtë rrugë tanimë ua ka hapur komiteti i energjetikës së BE-së.

“Serbia nuk do t’i kthejë vullnetarisht milionat që ka përfituar nga rrjeti energjetik i Kosovës, edhe pse i është kërkuar një gjë e tillë. KOSTT-i duhet t’i ndjekë rrugët juridike sepse Serbia ka përfitime milionëshe dhe nuk e bën një gjë të tillë vullnetarisht”, ka thënë Kurshumliu.

Ai tha se është humbje kohe deri më tani që KOSTT-i nuk ka marrë vendime për të ndjekur rrugët ligjore.

Ethem Çeku, ish-ministër i energjetikës, ka thënë për “Zërin” se energjetika në vend, viteve të fundit nuk ka arritur të shënojë progres.

Ai ka thënë se ende nuk ka përfunduar linja 400 KW me Shqipërinë, për të cilën ishte arritur në vitin 2005-2006, që, sipas tij, kjo linjë do të ndihmonte që të mos vareshim nga Serbia.

“KOSTT duhet të bëjë ankesa në çdo institucion energjetik ndërkombëtar që të tregojë se është i pavarur”, ka thënë Çeku.

Sipas tij, KOSTT-i është dashur në dy aspekte të veprojë, për të mos u varur nga Serbia në këto momente.

“Së pari është dashur të përfundojë ndërtimi i linjës 400 KW me Shqipërinë, ndërsa nën dy, është dashur që t’i ndjekë të gjitha rrugët juridike për të marrë pozitë të pavarur nga ndikimi që e ka tani nga Serbia”.