Mandati katërvjeçar u ka sjellë shumë para dhe privilegje anëtarëve të Bordit të Drejtorëve të Postë Telekomit të Kosovës (PTK). Anëtarët e këtij bordi, kryesisht anëtarë të dy partive më të mëdha në vend, PDK-së dhe LDK-së që u emëruan gjatë mandatit të kaluar, kur këto dy parti qeverisnin me vendin, përpos pagave të përcaktuara nga qeveria kanë përfituar qindra mijëra euro bonuse, vetura super luksoze dhe punësime të familjarëve në këtë kompani, e cila i jep pagat më të larta në vend për punëtorët.

Anëtarët e Bordit të PTK-së kompensohen maksimalisht nga qeveria, krahasuar me disa ndërmarrje më të vogla publike, pasi që janë në kategorinë A të ndërmarrjeve publike. Kështu për kryetarin e Bordit çdo muaj parashihet pagesë prej 850 euro për takimet e Bordit, 200 euro për pjesëmarrje në Komisionin e Auditimit, si dhe 200 euro për pjesëmarrje në komisione tjera.

Ndërsa anëtarët e Bordit paguhen 750 euro në muaj, 150 euro për pjesëmarrje në komisionin e auditivit, ndërsa 210 euro për pjesëmarrje në komisionet tjera.

Përpos këtyre kompensimeve, Bordi i PTK-së vazhdimisht ka përfituar bonuse të majme bashkë me punëtorët e kompanisë. Sipas disa raporteve financiare, PTK në vitin 2008 kishte shpenzuar 109 mijë euro për kompensimin e anëtarëve të Bordit, 192 mijë euro shpenzimet kishin arritur në vitin 2009, ndërsa rreth 200 mijë euro në vitin 2010.

Për kreun e Bordit të Drejtorëve, Rexhë Gjongalaj, ish-kryshefi ekzekutiv i PTK-së, Shyqri Haxha, në vitin 2009 ishte kujdesur t’ia blejë një veturë luksoze të markës “Range Rover”, në vlerë prej 60 mijë euro, të cilën veturë Gjonbalaj e ka aksidentuar dy herë.

Pavarësisht se blerja e veturave për Bordin nuk parashihet askund në Ligjin për Ndërmarrjet Publike, vitin e kaluar Gjonbalaj kishte deklaruar për “Zërin” se shfrytëzimin e veturës ia ka lejuar Bordi, të cilin Bord vetë e drejton, pasi që, siç ka thënë ai, i duhet të udhëtojë nga Peja në Prishtinë.

Përpos kësaj Gjonalaj pati thënë se për shfrytëzimin e veturës e ka aprovimin gojor nga aksionari. “Nuk kam ndonjë aprovim me shkrim nga aksionari, në këtë rast nga Qeveria, por e kam një aprovim gojor. Unë asnjë vendim nuk e ndërmarrë pa aprovimin e aksionarit”, ka pohuar Gjonbalaj.

Bordi ka edhe zyrë në PTK, e cila nuk parashihet në ligj, mirëpo ai pati pohuar më herët se të njëjtën e shfrytëzon vetëm për takimet e Bordit.

Anëtarët e Bordit të Drejtorëve kanë shfrytëzuar rastin që gjatë mandatit të tyre të punësojnë edhe familjarë në Postë-Telekomin e Kosovës (PTK).

Elmaze Pireva ka punësuar vëllanë në PTK, anëtari tjetër i Bordit, Nuhi Ahmeti, gjatë mandatit të tij e ka punësuar gruan në kompani, ndërsa Sahit Surdulli e ka punësuar djalin.

Të martën e kaluar, gazeta “Zëri” i ka dërguar disa pyetje zëdhënësit të PTK-së, Menduh Abazi, se sa para bonuse kanë marrë Bordi i Drejtorëve të PTK-së, duke e përfshirë edhe vitin 2011, përkatësisht nga viti 2009-2011, mirëpo ai nuk është përgjigjur fare për gati një javë.

As kreu i Bordit të Drejtorëve, Rexhë Gjonbalaj, nuk është lajmëruar në telefon, pavarësisht përpjekjeve të vazhdueshme të gazetës gjatë gjithë javës së kaluar.

Ndërkaq, sipas Ligjit mbi Ndërmarrjet Publike, drejtorëve të Bordit do t’u paguhet një honorar themelor, i cili përcaktohet në përputhje me nenin 20.2, për kohën e shpenzuar në mbledhjet e Bordit.

Drejtorëve po ashtu do t’u paguhet një kompensim për stimulimin e efektshmërisë në përputhje me deklaratën për politikën e kompensimin, e cila përgatitet dhe zbulohet nga Komisioni i Auditimit i Bordit të Drejtorëve në përputhje me paragrafi n 4 të këtij neni.

Neni 20.2 i Ligjit thotë se honorari themelor për drejtorët e NP do të përcaktohet (i) me një vendim me shkrim të Qeverisë së Kosovës për NP Qendrore, dhe (ii) me një vendim të Komisionit (eve) përkatës Komunal të Aksionarëve, për NP Lokale.