(E plotësuar) Pakkush do të besonte se në vendin më të varfër në Evropë, përfaqësuesit qeveritarë në kompani publike marrin mëditje astronomike, prej mbi 3000 euro. Për një mbledhje ata paguhen sa presidentja e Kosovës që merr për një muaj.

Përgjegjësi e Bordeve me ligj është zhvillimi i kompanive publike, përderisa shumë nga ata janë përkujdesur për zhvillimin e standardit të tyre personal, duke përfituar shuma marramendëse financiare dhe duke punësuar familjarë, ndërkohë që kompanitë nga të cilat paguhen nuk njohin afarizëm pozitiv dhe nuk janë të qëndrueshme financiarisht siç është rasti i Korporatës Energjetike të Kosovës (KEK).

Madje disa prej anëtarëve të Bordit janë edhe në hetime të policisë dhe prokurorisë për dëmtim të kompanisë, siç është rasti i kreut të Bordit të PTK-së, Rexhë Gjonbalaj, i cili është akuzuar për dëmtim të kompanisë nga e cila ka marrë rreth 30 mijë euro në vit, pa iu llogaritur edhe benificionet tjera të shumta.

Anëtarët e Bordit të Ndërmarrjeve Publike në Kosovë, por edhe anëtarët e bordit të institucioneve tjera të pavarura, vazhdojnë të marrin mëditje marramendëse, në raport me pagat e zyrtarëve të lartë në instuticionet nga ata vijnë.

Pavarësisht se gjysma e popullsisë në Kosovë konsiderohet e varfër, anëtarët e bordit të ndërmarrjeve dhe institucioneve të pavarura, e të cilët kryesisht janë të emëruar politikisht, për vetëm një takim marrin deri në 3000 euro, derisa paga mesatare mujore në vendin tonë është gati dhjetëfish më e vogël sa mëditja e tyre për pjesëmarrje në një mbledhje të vetme të bordit.

Kryetari i bordit të drejtorëve të Postës dhe Telekomit të Kosovës (PTK), Rexhë Gjonbalaj, prin nga të gjitha bordet tjera për paratë që ai merr në cilësinë e mëditjeve në bordin e PTK-së.

Gjonbalaj ka deklaruar vetë në Agjencinë Kundër Korrupsionit (AKK), se si kryetar bordit të PTK-së, brenda një viti merr hiç më pak së 17 mijë e 558 euro.

Por, përpos kësaj shume, Gjonbalaj merr edhe hiç më pak se 11 mijë e 158 euro në vit në emër të performancës për menaxhim të suksesshëm të bordit.

Edhe Elmaze Pireva, në cilësinë e anëtares së bordit të PTK-së, ka deklaruar se për një vit nga PTK-ja ka marrë më shumë se 16 mijë euro.

Por, pagë gati të njëjtë si të drejtorit të bordit, ka marrë edhe anëtari tjetër i bordit të PTK-së Nuhi Ahmeti.

Ai në emër të pagës dhe përformancës për punë të mirë, nga PTK-ja brenda një viti merr më hiç më pak së 28 mijë e 391 euro.

Para të majme nga PTK-ja merr edhe anëtari tjetër i bordit të drejtorëve të PTK-së, Qamil Buzhala.

Ai vetë ka deklaruar se ne emër të pagës dhe performancës për menaxhim të suksesshëm brenda një viti merr hiç më pak se 29 mijë e 620 euro.

Mëditje marramendëse për pjesëmarrje në mbledhje të rregullt të bordit po ashtu kanë marrë edhe dy anëtarët tjetër të bordit të ndërmarrjes më profitabile në vend.

Sahit Surdulli ka deklaruar se në emër të pagës dhe performancës brenda një viti merr 26 mijë e 767 euro, ndërkaq Gani Sylaj merr 28 mijë e 715 euro.

Në bazë të një përllogaritje, Posta dhe Telekomi i Kosovës brenda një viti vetëm për mëditje të anëtareve të bordit shpenzon më shumë se 160 mijë euro.

Por, përpos pagave bordi i drejtorëve të PTK-së gëzon edhe shumë privilegje tjera që s’i kanë anëtarët e bordit të ndërmarrjeve tjera publike, por edhe atyre të pavarura që operojnë në vendin tonë.

Zyrtarë të PTK-së nuk kanë dashur të tregojnë se sa ka qenë numri i mbledhjeve të mbajtura gjatë vitit që lamë pas.

Por, burime të gazetës thonë se në bazë të ligjit bordi maksimum mund t’i mbajë vetëm 12 takime, pasi që aq parashihet edhe me ligj, ku i bie se për çdo takim të mbajtur Gjonbalaj ka marrë hiç më pak se 2400 euro.

Morina 3200 euro ditën

Por, nuk është vetëm Posta dhe Telekomi i Kosovës ( PTK), që paguan mëditje marramendëse për anëtarët e bordit. Edhe Trusti i Kursimeve Pensionale të Kosovës (TKPK), vazhdon të shpenzojë një shumë të konsiderueshme të mjeteve për mëditje të anëtarëve të bordit.

Anëtarët e bordit të TKPK-së, përpos privilegjeve marrin edhe mëditje super të mira, në raport me shërbyesit më të lartë civilë që punojnë në institucione të Kosovës.

Ruzhdi Morina, anëtar i bordit të Trustit, i deleguar nga Bashkimi i Sindikatave të Pavarura të Kosovës, ka deklaruar se brenda një viti nga TKPK-ja merr 12,825 euro për një vit. Pagë të njëjtë vjetore Morina merr edhe nga Hekurudhat e Kosovës.

Anëtari tjetër i TKPK-së, Ymer Havolli, ka deklaruar se si kompensim për pjesëmarrje në bord, brenda një muaji merr 1250 euro, apo hiç më pak se 15 mijë euro në vit.

Ejup Qerimi, ish-sekretar i Odës Ekonomike të Kosovës, merr një shumë të konsiderueshme të mjeteve si kompensim për pjesëmarrje në bordin e TKPK-së. Ai ka deklaruar se për një vit nga TKPK-ja merr 7500 euro.

Por, në bordin e TKPK-së janë edhe disa anëtarë ndërkombëtarë të bordit, të cilët po ashtu marrin shumë marramendëse për katër takime që i mbajnë brenda një viti.

Në anën tjetër, zëdhënësi i TKPK-së, Jeton Demi, thotë se Bordi Udhëheqës i Trustit mbanë tri lloj të takimeve.

Sipas tij, bordi i mban katër takime të rregullta vjetore, ku analizohet performanca e investimeve dhe aktiviteti i gjithëmbarshëm i Trustit. Ai tha se anëtarët e bordit marrin pjesë edhe në video konferencat, ku zhvillojnë konsultime dhe marrin vendime për çështje me rëndësi, po për të cilat jodomosdoshmërisht duhet të mblidhen fizikisht.

“Takime sipas nevojës, janë takime kryesisht të anëtarëve vendorë të Bordit, të cilët zhvillojnë takime me Komisionet Parlamentare, takime me menaxhmentin e Trusti-t, shoqërinë civile, medie e të tjera. Për takimet e nivelit 2 dhe 3 ne nuk kemi mbajtur shënim”, tha zëdhënësi Demi.

Luboteni, 65 mijë euro mëditje e honorar

Banka Qendrore e Kosovës vazhdon të shpenzojë shumë të konsiderueshme të parave për paga të bordit.

Gazmend Luboteni, kryetar i bordit të drejtorëve të BQK-së, është ndër njerëzit më të paguar në Kosovë. Ai brenda një viti, për tre punë që bën merr hiç më pak se 65 mijë euro.

Luboteni ka deklaruar se në emër të honorarëve nga BQK-ja brenda një viti merr 29 mijë e 610 euro. Luboteni po ashtu brenda një viti i merr edhe 23 mijë euro si honorar nga Universiteti i Prishtinës si dhe rreth 13 mijë euro nga kolegji privat “Fama”.

Edhe Mejdi Bektashi, anëtar i bordit të BQK-së, merr një shumë të konsiderueshme të mjeteve, si kompensim për pjesëmarrje në bord. Ai ka deklaruar në Agjencinë Kundër Korrupsionit se si anëtar bordi nga BQK-ja për një vit merr 25 mijë e 168 euro.

Më shumë se 17 mijë euro brenda një viti si kompensim për pjesëmarrje në bord ka marrë edhe anëtari tjetër i bordit të BQK-së, Sejdi Rexhepi.

Më shumë mëditje se pagë

Mëditje të majme marrin edhe anëtarët e bordit të Korporatës Energjetike të Kosovës (KEK). Madje në disa raste mëditja e tyre vjetore si anëtar bordi, është dyfish më e madhe se sa paga që ata e marrin në institucionin ku ata punojnë.

Agim Nika, anëtar i bordit të KEK-ut, brenda një viti ka deklaruar se merr 9 mijë e 915 euro. Ndërkaq, si zyrtar i lartë në Doganat e Kosovës ai merë një pagë vjetore prej 6 mijë e 915 euro.

Edhe Flamur Keqa, në cilësinë e anëtarit të bordit të KEK-ut brenda një viti ka deklaruar se merr hiç më pak se 10 mijë e 800.00, ndërkaq Keqa si zyrtar i lartë në Ministrinë e Tregtisë dhe Industrisë merr një pagë vjetore prej 7 mijë e 900 euro.

Edhe rektori i Universitetit të Prishtinës, Mujë Rugova, edhe më tej siguron të hyra të konsiderueshme nga puna që bën në bordin e KEK-ut dhe atë të rektorit të Universitetit të Prishtinës.

Rugova ka deklaruar se nga KEK-u brenda një viti merr 9.200 euro, ndërkaq nga Rektorati merr një pagë vjetore prej 18 mijë euro.

Edhe anëtari tjetër i bordit te KEK-ut, Izet Ibrahimi, merr një mëditje prej 10 mijë e 800 euro nga Korporata Energjetike e Kosovës, deri sa paga e tij vjetore si menaxher në një laborator është 9600 euro.

Pagë të njëjtë sikur të Ibrahimit merr dhe anëtari tjetër i bordit të KEK-ut, Ismajl Jonuzi.

Zogiani: Borde shkatërruese

Avni Zogiani nga Organizata për Dinjitet dhe Antikorrupsion “Çohu”, thotë se bordet e ndërmarrjeve kanë shkatërruar ndërmarrjet publike në Kosovë.

Sipas tij, nuk ka logjikë që një anëtar i bordit të Postës dhe Telekomit të Kosovës të marrë rreth 30 mijë euro në vit, edhe pse performanca e tyre është skandaloze.

“Unë s’e kam të qartë se qysh mund të marrë tërë atë pagë Rexhë Gjonbalaj, kur ai ka ulur tejmase vlerën e kompanisë, për të cilën ai edhe akuzohet nga prokuroria”, tha Zogiani.

Sipas tij, bordet e ndërmarrjeve, por edhe institucioneve të pavarura të cilat janë politike, kanë dëmtuar rëndë ndërmarrjet, madje, sipas tij, një gjë të tillë e konfirmojnë edhe vetë raportet e drejtuesve të këtyre ndërmarrjeve.

PTK

Rexhë Gjonbalaj 28,716 euro

Elmaze Pireva 16,005 euro

Nuhi Ahmeti 28,391 euro

Qamil Buzhala 29,620 euro

Sahit Surdulli 26,767 euro

Gani Sylaj 28,715 euro

TRUST

Ruzhdi Morina 12,825 euro

Ejup Qerimi 7,500 euro

Ymer Havolli 15,000 euro

BQK

Gazmend Luboteni 29,610 euro

Mejdi Bektashi 25,168 euro

Sejdi Rexhepi 17,160 euro

KEK

Agim Nika 9,744 euro

Flamur Keqa 10,800 euro

Mujë Rugova 9,200 euro

Fadil Çitaku

Ismajl Jonuzi 10,800 euro

Izet Ibrahimi 10,800 euro