Për mbi 115 milionë euro kredi kanë lejuar institucionet mikrofinanciare në Kosovë, përderisa vlera mesatare e një kredie është më e ulët se 1900 euro. Sipas raportit të fundit të stabilitetit financiar të Kosovës, të përgatitur nga Banka Qendrore, mikrofinanciarët kanë një pjesëmarrje prej 4.1 për qind në asetet e përgjithshme të sektorit financiar.

Sipas statistikave të BQK-së, numri i kredive të lëshuara nga këto institucione deri në gjysmën e parë të vitit të kaluar ka arritur në rreth 64 mijë, që paraqet një rritje prej 4 për qind, krahasuar me periudhën e njëjtë të vitit të kaluar.

Institucionet mikrofinanciare janë të orientuara në dhënien e kredive, kryesisht nëpër zonat rurale të vendit dhe ka ankesa të vazhdueshme për norma të lartë të interesit në kredi.

Sipas burimeve të gazetës “Zëri” brenda BQK-së norma vjetore e interesit në kredi që aplikohet nga institucionet mikrofinanciare shkon deri në 30 për qind, që është shumë e lartë dhe e papërballueshme për klientët.

“Normat e interesit në kredi shkojnë deri në 30 për qind, mirëpo BQK nuk mund të ndërhyjë në këtë drejtim”, shton burimi i “Zërit”.

Sektori i institucioneve mikrofinanciare në Kosovë numëronte gjithsej 17 institucione

(qershor 2011). Industria mikrofinanciare në Kosovë vazhdimisht është karakterizuar me një shkallë relativisht të lartë të koncentrimit të tregut.

Megjithatë, shkalla e koncentrimit ka shënuar rënie të vazhdueshme dhe kjo rënie ishte

më e theksuar gjatë gjysmës së parë të vitit 2011.

Pjesëmarrja e kredive të lëshuara nga institucionet mikrofinanciare në gjithsej kreditë e lëshuara nga sektori financiar i Kosovës janë 6.6 për qind në qershor 2011, që paraqet nivel më të ulët krahasuar me atë të periudhës së njëjtë të vitit të kaluar (7.5 për qind).

Vlera mesatare e një kredie të lëshuar nga institucionet mikrofinanciare gjatë gjysmës së parë të vitit 2011 ishte 1,804.7 euro, krahasuar me 1,896.2 euro sa ishte në gjysmën e parë të vitit 2010.

Në anën tjetër, vlera e përgjithshme e kredive të lëshuara nga bankat komerciale në vend arrin në 1.6 miliard euro( qershor 2011).

Për dallim nga bankat, institucionet mikrofinanciare nuk lejohen me ligj të pranojnë depozita, por vetëm të japin kredi.