Institucionet mikrofinanciare në Kosovës (IMF), edhe më tej vazhdojnë të fitojnë shuma të konsiderueshme të parave nga kreditë e shtrenjta që japin ato, kryesisht për qytetarë që jetojnë në vise rurale.

Për shkak se në vendin tonë ky biznes është treguar tejet profitabil, numri i institucioneve mikrofinanciare, është duke u rritur dita ditës, duke marrë parasysh se qasja për të marrë kredi është shumë më e lehtë.

Të dhënat e Bankës Qendrore të Kosovës, tregojnë se aktualisht të licencuara janë 17 institucione mikrofinanciare, por kërkesa për licenca të reja ka në vazhdimësi.

Sipas Raportit të Stabilitetit Financiar të Bankës Qendrore të Kosovës thuhet se në gjysmën e parë të vitit 2011, industria e IMF-ve përmirësoi dukshëm performancën e saj. Kjo për arsye se deri në qershor 2011, IMF-të kaluan në fitim prej 0.8 milion euro, nga humbja prej 1.1 milion eurosh që kishin realizuar në periudhën e njëjtë të vitit të kaluar.

“Në fillim të vitit 2011, njëra ndër IMF-të më të mëdha që operojnë në vend, gjegjësisht “KEP Trust”, u kaplua nga disa probleme të qeverisjes së brendshme, të cilat vështirësuan funksionimin normal të këtij institucioni.

Megjithatë, BQK-ja në rolin e rregullatorit ishte aktive në zgjidhjen e këtij kontesti, duke vënë këtë institucion nën administrim të përkohshëm dhe duke rikthyer me sukses gjendjen në normalitet, gjë që rezultoi me përfundimin e administrimit të përkohshëm nga BQK-ja”, thuhet në raportin e fundit të BQK-së.

Në anën tjetër, ekspertë të ekonomisë dhe përfaqësues të shoqërisë civile në vend, thonë se institucionet mikrofinanciare kanë dëmtuar tejmase qytetarët e Kosovës, duke u dhënë kredi me kamata të larta e që në disa raste ato kanë qenë të papërballueshme për ta.

Selatin Kaçaniku, nga shoqata për mbrojtjen e konsumatorit “Konsumatori”, thotë se bankat në Kosovë japin kredi me kamata të larta, por, sipas tij, institucionet mikrofinanciare lëshojnë kredi edhe me kamata më të larta sesa bankat.

“Një pjesë e qytetarëve nuk kanë zgjidhje tjetër dhe detyrohen të trokasin në dyert e këtyre shoqatave edhe pse kamatat janë tejet të larta”, tha ai.

Përndryshe, sipas të dhënave të Bankës Qendrore te Kosovës në vendin tonë janë të licencuara 17 institucione mikrofinanciare. Në ueb-sajtin e BQK-së figurojnë të licencuara: “Agency for Finance in Kosovo”, “Atlantic Capital Partners ACP”, “Balkanactie”, “Beselidhja” “Qelim Kosovë”, “Cordaid”, “Finca”, “KEP Trust”, “KGMAMF”, ”Kosinvest World Vision”, “Kosova Aid and Development”, “Kreditimi Rural i Kosovës”, “Meshtekna”, “Perspektiva 4” “Start”, “Agro Invest” dhe “Timi Invest”.