Institucionet mikrofinanciare, edhe përkundër kamatave më të larta, krijojnë lehtësira, kur bëhet fjalë për nevojë për shuma të vogla të parave. Pa pasur nevojë për ndonjë biznes-plan e ndonjë garancion të madh, mund të merren kreditë e vogla në këto institucione.

Mesatarja e dhënies së kredive nga këto institucione sillet rreth 2 mijë euro, e kamatat shkojnë deri në 24 për qind, derisa në vend operojnë 17 institucione të tilla.

Vahdet Anadolli, drejtor i bordit të shoqatës së institucioneve mikrofinanciare (AMIK), ka thënë se në vend veprojnë 17 institucione mikrofinanciare, por në kuadër të kësaj shoqate, operojnë vetëm 12 institucione.

Ai ka thënë se këto institucione mikrofinanciare, janë të formuara nga organizata ndërkombëtare, dhe se e rëndësishme për këto institucione është të bëhen të vetëqëndrueshme.

Sipas tij, ata nuk financohen nga depozitat, sepse nuk kanë të drejtë të mbajnë depozita. “Financimi i institucioneve mikrofinanciare, bëhet me kredi direkte nga jashtë, prandaj ne dallojmë nga bankat komerciale”, ka thënë ai.

Anadolli ka thënë se kreditë e këtyre institucioneve janë më të larta, për dallim nga bankat komerciale.

“Në këtë sektor të institucioneve mikrofinanciare, kreditë janë më të larta nga bankat komerciale, ngase siç e sqarova ne dallojmë nga financimi krahasuar me bankat. Kamatat në këtë sektor sillen prej 18 deri në 24 për qind”, ka thënë Anadolli, duke shtuar se ka edhe institucione financiare që janë islamike e që përqindjen e kamatave e kanë zero.

Sipas tij, kryesisht këto institucione japin kredi të vogla, ku mesatarja e kredive duhet të jetë nën 2 mijë euro.

“Rreth 1 mijë e 800 euro duhet të sillet mesatarja e shumave të dhënies së kredive nga këto institucione”. Ai ka shtuar se këto organizata si mision kanë që t’i shërbejnë mikrobizneseve, apo edhe personave të ndryshëm, që nuk ka ndonjë plan biznesor, por për nevoja të ndryshme, pasi që janë kredi shumë të vogla.

Dominim më të madh, sipas Anadollit, këto institucione kanë në fshatra, pasi që kreditë janë shumë të vogla dhe u kryejnë më shumë punë bujqve, kur bllokohen për shuma të vogla të parave.

Ai ka sqaruar se procedurat tek institucionet mikrofinanciare, janë shumë të lehta për marrjen e kredive, pasi që, siç ka thënë ai, nuk kanë të bëjmë me shuma të mëdha të kredive.

“Nuk shkaktojmë telashe me shumë dokumente, mjafton të sigurohemi se me të hyrat që ka personi që e merr atë kredi mund ta kthejë atë. Nuk kërkojmë ndonjë biznes-plan për dhënie të kredisë”, ka shtuar ai.