Prishtinë. Përfaqësues të partive opozitare, por edhe ish -anëtarë të bordit të Autoritetit Rregullativ të Telekomunikacionit (ART) kërkojnë nga institucionet e larta të shtetit që ambasadori i Kosovës në Slloveni, Anton Berisha, të japë llogari për mosinkasimin e 16,2 milionë eurove, pasi që operatori “Cosmocell” nuk arriti të paguajë mjetet për licencën e dytë të operatorit të dytë të telefonisë mobile në vend.

Ish -anëtari i bordit të ART-së, Aziz Sefedini, thotë se në atë kohë ai është përjashtuar nga vendimmarrja për operatorin e dytë të telefonisë mobile.

“Anton Berisha pjesën dërrmuese të veprimeve i ka marrë në formë arbitrare, sepse ka pasur përkrahjen e Joachim Ruckerit, ish-kryeadministrator i Kosovës, ka pasur përkrahjen e kryeministrit, por edhe të ministrit të Transporteve. Puna e garancisë asnjëherë nuk ka dalë në bord, ajo ka shkuar në nivele më të larta.

Me ligj të telekomunikacionit e tërë përgjegjësia për këtë çështje bie mbi Anton Berishën, i cili ka qenë kryesues i bordit. Antoni në ART ka punuar gjithçka, sepse ka pasur përkrahjen e tjerëve”, tha ai.

Sefedini thotë se më këtë çështje duhet të merret prokuroria. “Nuk i di arsyet pse u ndërprenë hetimet në lidhje më ketë çështje”shtoi ai.

Ndërsa anëtari i komisionit përzgjedhës së operatorit të telefonisë mobile, Arben Çirezi, i cili në atë kohë ka qenë këshilltar i ish-kryeministrit Agim Çeku, thotë se i ka vëzhguar të gjitha proceset, por tash nuk guxon të flasë për këtë çështje, sepse, siç thotë, para se të emërohej anëtar i komisionit ka nënshkruar marrëveshjen për ruajtje të sekreteve.

“Ne kemi nënshkruar kontratën e konfidencionalitetit dhe nuk mundemi të dalim në opinion me deklarata”,tha ai.

Ndërkaq, Myzejene Selmani, kryetare e Komisionit parlamentar për Ekonomi, thotë se çdo kush që e nënshkruan një dokument duhet të japë llogari për dëmet që i ka shkaktuar buxhetit të vendit.

“Pa marrë parasysh ku gjendet Anton Berisha dhe pa marrë parasysh se çfarë funksioni kryen, ai duhet të jep llogari për veprimet e tij”,tha ajo.

Selmani thotë se vetë zyrtarë të ART-së ia kanë konfirmuar asaj se EULEX-i është duke hetuar çështjen e “Cosmocellit” për shkak se ART-ja deri më tash nuk ka ekzekutuar garancinë bankare prej 16.2 milionë eurosh.

Edhe Driton Tali, deputet i pavarur në Kuvendin e Kosovës, thotë se çështja e garancisë bankare duhet të qartësohet sa më shpejt që është e mundur.

“Anton Berisha duhet të qartësojë se a ka qenë garancia bankare valide dhe nëse ka qenë valide ai duhet të sqarojë pse nuk është ekzekutuar ajo prej asaj kohe e deri më tash. Nëse del që garancia ka qenë jovalide, Anton Berisha duhet të shkarkohet nga posti i ambasadorit dhe duhet të japë llogari para organeve të drejtësisë për dëmet që i ka shkaktuar Kosovës në mosinkasimin e 16,2 milionë eurove”tha ai.

Çitaku: S’ka pasur kërkesë për shkarkimin e Berishës

Në anën tjetër, zyrtarë të Qeverisë së Kosovës si duket janë duke u treguar shumë indiferentë rreth garancisë bankare të “Cosmocell”.

Zëvendësministrja e Punëve të Jashtme e Kosovës, Vlora Çitaku, thotë se kur ka shpallur konkurs Ministria për ambasadorë, ka konkurruar edhe ish- shefi i ART-së.Sipas saj, ai ka sjellë vërtetimin prej gjykatës që nuk është nën hetime.

“Ai është përzgjedhë ambasador. Deri më tash nuk ka pasur ndonjë kërkesë për shkarkimin e tij nga pozita që mban”,tha ajo.