Edhe Kosova e ka Hyde Park-un e vet. Vetëm se te ne quhet Hajt Pak! Dhe, për këtë, me shumë mjeshtëri, është përkujdesur njëri nga televizionet tona nacionale...

Në Hyde Park të Londrës je i lirë të flasësh, të protestosh, të bërtasësh, të shash... Kush nuk ta var veshin dhe kush nuk e ka gajle për ato që thua!

Edhe në Hajt Pak të Kosovës je i lirë të flasësh, të kritikosh, të qortosh... Kush nuk ta var veshin dhe nuk e ka gajle për ato që thua!

Nuk e di nëse ndokush nga bartësit e funksioneve publike (që nga niveli lokal e deri tek ai qendror) i dëgjon ndonjëherë qytetarët që ndalen para mikrofonit dhe para kamerës në Hajt Pak?

Njeriut, nganjëherë, kur i dëgjon ato deklarata të thëna me aq mllef, për probleme madhore të kësaj Kosove, i rrëqethet lëkura në trup!

I rrëqethet lëkura lëkurëhollit, por jo edhe lëkurëtrashit!

A është e mundur që ato deklarata të qytetarëve të jenë deklarata të kurdisura? A është e mundur që ata njerëz të jenë njerëz të selektuar? A është e mundur që ata njerëz t’i mësojë dikush para se të ndalen para mikrofonit?...

Kurrë nuk besoj! Nga reagimet para kamerës shihet se fjalët u burojnë nga zemra. Janë reagime të pakënaqësisë me gjendjen dhe me njerëzit lëkurëtrashë, prandaj janë reagime nëpërmjet të të cilave kërkohet shteg, kërkohet rrugë alternative.

Unë, për vete, më mirë i përcjell deklaratat në Hajt Pak sesa diskutimet në seancat e Parlamentit të Kosovës. Hajt Pak-u është parlament shumë i fortë! Më besoni! Hajt Pak-u ua dha votat atyre në Parlament, prandaj është më i fortë se Parlamenti!

Hajt Pak-u është Hajt Shumë!

Është vox populi!

Por, nëse lëkurëtrashët nuk kanë kohë për të dëgjuar vox populi-n, këshilltarët e lëkurëtrashëve (nëse edhe ata kanë kohë) është mirë nganjëherë t’u tregojnë atyre se çfarë kanë parë e çfarë kanë dëgjuar në Hajt Pak. Nëse jo për tjetër, atëherë për t’u treguar se nga po shkon populli!

Veç, lëkurëtrashët të mos sillen pastaj sikur mbretëresha frënge Maria Antoaneta (bashkëshortja e mbretit Lui XVI), të cilës, kur i kanë thënë njerëzit që kishte përreth se populli është ngritur në këmbë dhe po ankohet ngase nuk po ka bukë për të ngrënë, ajo u përgjigjet: “Nëse nuk kanë bukë, pse nuk po hanë kuleç!”...

behxhet.haliti@zeri.info

(Autori është zëvendëskryeredaktor i gazetës “Zëri”)