Behxhet Haliti

Vendi i njëjtë, aktorët e njëjtë, ndryshuan vetëm numrat! Ishin 44 me 33, tash u bënë 59 me 41! Por, atëherë, Ai nuk ishte aty. Ishte jashtë vendit! Kësaj radhe asgjë nuk i la rastësisë...

Mocion mbi mocionin!

Kështu ndodhi të premten, më 20 janar 2012, në Kuvendin e Republikës së Kosovës, kur PDK-ja me partitë e koalicionit të vet arriti ta rrëzojë mocionin e Vetëvendosjes, të LDK-së dhe të AAK-së, të 7 dhjetorit 2011, për marrjen e masave të reciprocitetit në raport me mallrat e Serbisë.

Kjo ndodhi vetëm gjashtë ditë pas protestës së Lëvizjes Vetëvendosje në pikat kufitare të Republikës së Kosovës me Republikën e Serbisë, në Merdar dhe te Dheu i Bardhë.

Dhe, kjo ndodhi vetëm dy ditë para protestës së paralajmëruar të Lëvizjes Vetëvendosje për datën 22 janar 2012, po në dy pikat e përmendura kufitare.

Ama, për ato gjashtë ditë ndodhi shumëçka!

Ndryshoi shumëçka!

Ndryshuan numrat në Kuvendin e Kosovës!

Ndryshimi i numrave në Kuvend bëri që edhe motoja e protestës së Lëvizjes Vetëvendosje të ndryshojë nga “Në mbrojtje të Kuvendit të Republikës së Kosovës nga Qeveria e Kosovës! Serbia nuk kalon!”, në moton “Në mbrojtje të Republikës! Për prodhime të vendit! Serbia nuk kalon!”.

Ndryshimi i motos së protestës së Lëvizjes Vetëvendosje për datën 22 janar, bëri që të ndryshojë në të mirë edhe numri i protestuesve (sipas raportimeve) në të dy pikat kufitare të Kosovës me Serbinë!

Ndryshimi në të mirë i numrit të protestuesve bëri që të ndryshojë edhe qëndrimi i Policisë së Kosovës ndaj demonstruesve më 22 janar!

Ndryshimi i qëndrimit të Policisë së Kosovës ndaj demonstruesve tregoi se ka ndryshuar edhe qëndrimi i Qeverisë së Kosovës, i kryeministrit Thaçi dhe i ministrit Rexhepi, sepse nuk iu dha urdhër policëve për të ndërhyrë ndaj protestuesve...

A po e shihni?

U kënaq kryeministri Thaçi me numrat, u kënaq edhe ministri Rexhepi meqë u kënaq Shefi i tij, u kënaq edhe Policia e Kosovës, meqë u kënaq ministri, u kënaqën gazetarët sepse çelnin udhë në përcjellje të Policisë së Kosovës, dhe – u kënaq edhe Lëvizja Vetëvendosje sepse protestoi lirshëm!...

Të gjithë ndryshuan pas 14 janarit 2012!

Por, nuk ndryshoi vetëm televizioni publik i Kosovës – Radio-Televizioni i Kosovës!

Pse?

Derisa në Kosovë ndodhte ngjarja kryesore e ditës, e paralajmëruar me kohë, me orë e me vend të caktuar, televizioni publik që e quan veten Radio-Televizioni i Kosovës (haram i qofshin ata eurot që m’i ka marrë dikur me faturë të KEK-ut!), në vend të pamjeve “live” nga dy pikat e protestës së Lëvizjes Vetëvendosje (siç bëri, për shembull, gjatë tërë kohës KTV-ja), kishte lëshuar në ekranet e veta filmin e animuar “Bee Movie” (një film i animuar me bleta), emetonte informacione për protestën vetëm në orët e plota kur kishte lajme, sikur protesta të ndodhte në Rumuni a diku tjetër (pra, ua shkeli qytetarëve të Republikës së Kosovës të drejtën për të qenë të informuar), ndërsa e kishte parë të udhës që, pas filmit të animuar “Bee Movie”, të emetonte edhe emision për rritjen e kakaos në plantacionet e Venezuelës dhe për mënyrën se si fitohet çokollata nga kakao!

Kaka-o për ne!