Isa Mustafa është njeri i pafat. Është zgjedhur kryetar i komunës, statusi dhe organizimi i së cilës rregullohet me Kushtetutë, por neni i Kushtetutës që rregullon statusin e Prishtinës ka numër të cilin shumëkush (jo vetëm ndër ne) e konsideron të pafat, “baksuz” – numrin 13!

Dhe, në Kushtetutën e Republikës së Kosovës shkruan:

Neni 13 [Kryeqyteti]

1. Kryeqyteti i Republikës së Kosovës është Prishtina.

2. Statusi dhe organizimi i kryeqytetit rregullohet me ligj.

Rregullohet me ligj, por me cilin se?

Me Ligjin për Prishtinën!

Ku është ai ligj?

Kanë kaluar pothuajse dy vjet që nga hyrja në fuqi e Kushtetutës së Kosovës, por Ligj për Prishtinën nuk ka.

Pse nuk ka?

Në prill të vitit 2009, Projektligji për Prishtinën është miratuar nga Qeveria e Kosovës, por nuk është proceduar kurrë për në Kuvendin e Kosovës për aprovim.

Zyrtarisht përmenden dy arsye për këtë shkelje të Kushtetutës nga dikush: kostoja e lartë e Projektligjit për Prishtinën dhe, sidomos, menaxhimi i Pallatit të Rinisë dhe Sporteve.

Akuzat nga Komuna e Prishtinës janë konkrete: Qeveria e Kosovës nuk e procedon Projektligjin për Prishtinës për në Kuvendin e Kosovës. Bile, Isa Mustafa ishte edhe më konkret këto ditë: Ministria e Transportit dhe e Postë-Telekomunikacionit nuk dëshiron të investojë në komunën e Prishtinës!

E, tash, a është arsye e prolongimeve të pafund kostoja e lartë e Projektligjit për Prishtinën (4% e buxhetit të tërësishëm të Kosovës, që do të thotë shuma prej rreth 8 milionë eurosh në vit), apo se dikush ia ka vënë syrin Pallatit të Rinisë dhe Sporteve, kjo mbetet çështje pa përgjigje të saktë. Përgjigjen e dinë sigurisht vetëm prolonguesit e këtij Ligji.

Me siguri këtë përgjigje e di edhe Isa Mustafa, por nuk dëshiron ta thotë ende. Ose, e thotë “me rrotlla”...

Po të mos ishte LDK-ja në koalicion qeverisës me PDK-në, ndoshta do të mund të thuhej qartë përgjigja: PDK-ja dëshiron t’i hakmerret Prishtinës, sepse ajo që nga paslufta është e LDK-së...

Tash, duke parë se askush në këtë shtet nuk po interesohet për Ligjin për Prishtinën, punën “e ka marrë në dorë” shoqëria civile. Organizatat e shoqërisë civile i janë drejtuar Qeverisë së Kosovës më kërkesën që ajo të japë shpjegime për arsyet e vërteta të mosaprovimit deri tash të Ligjit për Kryeqytetin...

Ju thashë se Isa Mustafa është njeri i pafat. Jam qind për qind i sigurt se shoqëria civile nuk do t’ia ndreqë punën!