Në pritje të lajmit të GJND-së u fitua përshtypja se në Kosovë po mbahet fryma që të mos ndodhë diçka që do e prishë imazhin e Kosovës para vendimit për ligjshmërinë e pavarësisë së shpallur dy vjet e gjysmë më parë. Mendimi këshillëdhënës erdhi më i mirë seç e kemi pritur dhe nuk la hapësire për (keq) interpretime nga ana e Serbisë as edhe për një fije floku.

Tani sikur të gjithë filluam të frymojmë më lirë. Qeveria pasi që merr më shumë oksigjen (frymon më lirë) ishte dashur të jetë më efektive në punën e saj. Tani presim të na prezantohet plani për ngritjen e njohjeve, për promovimin e investimeve dhe shtrirjen e autoritetit të institucioneve të Kosovës në gjithë territorin e saj.

Institucioni i cili na tregoi se ka më shumë elan për veprim doli të jetë EULEX-i. Policët dhe hetuesit vendorë dhe ndërkombëtarë më pak se 24 orë pas dhënies së mendimit për ligjshmërinë e pavarësisë tonë, ua mësyn dyerve të arkës së shtetit, Bankës Qendrore të Kosovës. Për disa orë hetime brenda e nxorën jashtë duarlidhur njeriun e parë të këtij institucioni, guvernatorin e Bankës Qendrore.

Sipas komunikatës së EULEX-it, akuzat ndaj tij janë mjaft të rënda: dyshohet për keqpërdorim të detyrës apo pozitës zyrtare, marrje të ryshfetit, shmangie të tatimit, ushtrim të ndikimit dhe larje parash. Duke mos dashur të paragjykoj fare vendimin e Gjykatës lidhur me rastin, dyshoj të kemi të bëjmë me një rast të izoluar të guvernatorit shumë të “shkathët” të angazhohet në të gjitha keqpërdorimet e lartpërmendura pa miratimin ose dijeninë e dikujt tjetër.

Përgjegjësia morale dhe institucionale imediate për tërë këtë pune i bie edhe Ministrisë së Ekonomisë dhe Financave. Sipas nenit 6 të ligjit mbi Bankën Qendrore, ku BQK-ja shërben si bankar i Ministrisë se Ekonomisë dhe Financave, si agjent fiskal dhe këshilltar i Qeverisë.

Nuk është e mundur që në gjithë procesin e keqpërdorimeve, MEF nuk ka pasur dijeni ose zyrtare të kësaj ministrie dhe Qeverisë nuk janë të involvuar edhe vete në akuzat për të cilat dyshohet guvernatori.

Arrestimi dhe ngritja e akuzave ndaj guvernatorit te BQK tregon për një dështim të sistemit institucional në Kosovë në ngritjen e kapaciteteve ekonomike.

Të gjithë e mbajmë mend mbikëqyrjen ndërkombëtare të këtij institucioni. Ne na kujtohen edhe lobimet e zyrave diplomatike për të vënë Hashim Rexhepin në krye të këtij institucioni. Lobohej derë më derë tek partitë politike për të marrë votat e duhura në Parlamentin e Kosovës. Tash së voni kur filluan hetimet, pati edhe përkrahje për të.

Ky rast dhe të tjerë që pasojnë tregon për shkurtpamësinë e disa udhëheqësve të cilët nuk kanë zgjedhur mjete e metoda për t’i vënë njerëzit e vet në poste ku mund të keqpërdoret pasuria e popullit.

Shumë delikat ka qenë posti i këtij njeriu për të qenë vetëm në këtë mesele. Do të tregojnë ditët në vijim për bashkëpunëtorët e tij, por një gjë është e saktë, pa krijuar sistem kontrolli dhe pa e futur rendin dhe ligjin në mendjen dhe sistemin e së cilit, nuk do të kemi as ekonomi e as zhvillim ekonomik.

Të shpresojmë të paktën se zëvendësimi i Hashim Rexhepit nuk do të zgjidhet për arsyet e gabuara, se prapë do të shfaqen skena te njëjta sikur të 23 korrikut.

Përkundrejt të gjithave, të shpresojmë se si shoqëri kemi filluar së mbari dhe oksigjenin që na liroi GJND-ja do të rrjedhë edhe në mendjet e tjera të shoqërisë dhe së fundi do të kemi një përparim. Pas konfirmimit të pavarësisë, tani vjen pastrimi i shoqërisë. Me fat, Kosovë!