Vrasja e dy ushtarëve amerikanë dhe plagosja e dy të tjerëve, nga ana e të riut Arid Uka me prejardhje nga Kosova, që është lindur dhe jeton në Frankfurt të Gjermanisë, u prit me keqardhje të madhe në Kosovë. Populli shqiptar është në mesin e atyre popujve që dëshiron të mirën ta kthejë me të mirë.

SHBA-të dhe administrata amerikane, gjatë tërë historisë pati qëndrim parimor ndaj kauzës sonë. Në veçanti me rastin e agresionit serb në vitet nëntëdhjetë të shekullit që lamë pas. Por, ajo vazhdon të ketë një qëndrim të tillë edhe pas shpalljes së pavarësisë së Kosovës. Andaj, është e kuptueshme që akti i 21-vjeçarit Arid Uka, me prejardhje nga Mitrovica, u prit me një keqardhje të madhe nga të gjithë shqiptarët dhe u vlerësua si një akt makabër.

Me këtë rast vlen të theksojmë se i përmenduri, përveç prejardhjes dhe disa vizitave të kohëpaskohshme që kishte bërë në vendlindje të prindërve të tij, nuk kishte pasur ndonjë kontakt me njerëzit e Kosovës. Andaj, thënë haptazi, ai ishte lindur, edukuar dhe shkolluar në Gjermani. Me gjithë keqardhjen tonë për tragjedinë që ka ndodhur, fajësia jonë si bashkëkombës dhe bashkëfetarë të Aridit nuk ishte e atij niveli që po paraqitet nga udhëheqës të disa institucioneve dhe medieve tona. Identiteti i tij kosovar në tërë këtë tragjedi pothuajse nuk vërehet fare. Aridi nuk kishte lidhje edhe me bashkësinë islame shqiptare që vepron në Frankfurt. Kjo më së miri shihet nga një bisedë që Radio Dojçe Welle zhvilloi me imamin e xhamisë së Frankfurtit, Ahmed Kajoshën, një shqiptar nga Dinosha e Malit të Zi, i cili pohon se nuk kishte pasur farë kontakti me të.

Andaj, realiteti duhet të jetë, ashtu siç pohon profesori gjerman Michael Daxner, ish-udhëheqës i Departamentit të Arsimit në vitet e para të pasluftës në Kosovë se “nuk mund të vendosen lidhje aq të thjeshta ndërmjet islamizmit, fesë, ideologjisë, Kosovës dhe vrasjes së dy ushtarëve amerikanë në Frankfurt”.

Ai pastaj vazhdon e thotë: “Unë do të druhesha dhe nuk do të vendosja lidhje midis islamit si fe, midis zhvillimeve islamike në Ballkan, midis deformimeve islamike të Kosovës dhe këtij sulmi. Unë besoj se është një argument i mirëpritur nga e djathta gjermane, por nga pikëpamja empirike nuk ekziston”, ka thënë Daxner për DW..

Pa pasur qëllimin për ta marrë në mbrojtje Aridin për krimin e bërë, por vetë fakti se ai ka vepruar individualisht, e jo në kuadër të ndonjë organizate terroriste, tregon se ndikimi i tij ka qenë më tepër i momentit dhe nga mediat sesa nga ndonjë indoktrinim i thellë fetar prej kujtdo qoftë.

Por, ajo që vlen të theksohet me këtë rast se indoktrinimi fetar islam është në rritje e sipër te gjenerata e dytë dhe e tretë e të rinjve myslimanë në botën perëndimore. Kjo më së miri u vërejt me rastin e shpërthimeve të Londrës në vitin 2005, si dhe në disa vende të tjera.

Propaganda e organizatave islamike radikale është e fuqishme dhe ajo po i shfrytëzon shumë mirë disa akte që po bëjnë disa ushtarë perëndimorë në disa vende ku po zhvillohen luftërat, siç është Afganistani. Apo disa bombardime që po bëhen ndaj civilëve. Arid Uka, si duket, mund të jetë viktimë e një propagande të tillë.