Fadil Lepaja

Fjala e kësaj jave nuk ishte “protestë”! Nuk ishte as fjala “dhunë”, “lotsjellës”, apo “reciprocitet”. Me këto fjalë tashmë jemi mësuar aq shumë, sikur me fjalët bukë apo ujë. Disa nga ne janë rritur me to e disa janë plakur tashmë me ehon e tyre.

Disa edhe janë vrarë në protesta! Në kohë të Serbisë! Në kohë të “Rumanisë”!

Dhuna dhe lotsjellësit janë dukuri që përcollën gjenerata. Fjala reciprocitet doli vonë. Nga vetë qeveria. Por, aq shpejt u shndërrua në hajgare. E, për dikë, edhe në ëndërr të keqe! Për dikë biznes!

Por, kësaj jave, një tjetër fjalë bëri përshtypje të madhe. Fjala e javës ishte: “Elasticitet”. Dorën në zemër, pakkush e ka pritur të dëgjojë këtë fjalë nga goja e njeriut që e tha dhe t’i dedikohet kujt iu dedikua!

Duke iu referuar medies, kjo fjalë doli nga goja e njeriut, i cili kurrë në jetën e tij politike nuk ka qenë i njohur për elasticitet. Aq më tepër, bëri përshtypje se ajo i dedikohej në kontekstin pozitiv kryeministrit të Kosovës.

Po e lavdëronte me këtë epitet. “Vetëvendosje gabon”, po thoshte. “Ai” është elastik.

Natyrisht askënd nuk e befasoi pohimi se Vetëvendosje mund të gabojë, sa pohimi i dytë për elasticitetin e politikanit, i cili prej se ka hipur drejtpërdrejt në pushtet, më shpesh po merr “epitete” për diktator.

Qytetarët e kujtojnë nga skena më e njohur e komedisë ndër ne, nga foltorja e Parlamentit të Kosovës. Ai nuk e kishte për problem që para qytetarëve të këtij vendi të devijojë e të bllokojë punën e Kuvendit sa herë i tekej, vetëm për ta bërë të veten. Krejt kjo bëhej para kamerave dhe nën mërmëritjet dhe kundërshtimet e pasuksesshme të kryeparlamentarit. Edhe organizata ndërkombëtare alarmuan për kontrollin e Qeverisë mbi Parlamentin.

Ky udhëheqës ”elastik” e bëri kiametin kur u bë aleanca LDK-AAK. Në mbledhjen e organit më të lartë të partisë së vet, ai pati thënë shumë gjëra të cilat u dedikohen vetëm armiqve. “Do të jemi opozitë destruktive” - pati klithur njeriu që sot e luan konstruktivin në teatrin tonë publik. Autori i kësaj kolumne, atëherë ishte përpjekur më kot t’i sqarojë liderit “elastik” se fjala opozitë destruktive do të thotë, diçka të keqe! Ai, atëherë, nuk mendonte ashtu. Por, ka kohë nga kjo, e njerëzit ndryshojnë!

Kujtojeni pastaj zgjedhjen e presidentit. Loja me SMS dhe bllokimi i punës së Kuvendit. Loja me deputetët, të cilët vetëm për pak minuta ndërruan mendimin e “lirë”.

Kujtojeni ligjin, i cili e mundësonte shitjen e njërës nga dy kompanitë e vetme profitabile, ku kjo u arrit vetëm përmes kontrabandimit të një neni në kuadër të një ligji tjetër.

Kujtojeni “elasticitetin” me të cilin e mbante peng krejt Kuvendin. Kujtojeni sa “elastik” ishte rreth çështjeve të tjera. Mundohuni të gjeni elasticitetin të cilin “Cabi” po e sheh!

Simboli i rezistencës, i cili nga njëri prej biografëve të tij, në zhargon, thirret “Cabi” (baci) papritmas e zbulon këtë cilësi të kryeministrit. “Elastik” - klith ai!

Ai po e lavdëronte politikanin, të cilin gjithnjë duke iu referuar biografit të tij, disa vite më herët e kishte quajtur “mafioz” e me “komplimente” të tjera të ngjashme.

Ndërkohë që “Cabi” nuk duket të jetë njohës i rekomandueshëm i elasticitetit, egoja e tij politike, përkundrazi, ishte aq e fuqishme sa nuk e thyen as 27 vjet burgim. I pathyeshëm. Në burg, në lëvizjen revolucionare, në lëvizjen paqësore të viteve 90-ta, në luftën çlirimtare, rreth Rambujesë, pas lufte. Shpesh dilte edhe vetë kundër të gjithëve.

Por kishte edhe raste kur keqkuptohej. Kur i quajti vëllezër serbët, shumëkush u ofendua edhe pse ai mbase po përpiqej që atëherë të hapte një rrugë besimi me qytetarët serbë, kundër regjimit. U keqkuptua edhe “Ballkania”. Ndoshta po e keqkuptojmë edhe elasticitetin.

Konteksti në të cilën e përdori fjalën elasticitet, ndërlidhet me kualitetet politike të kryeministrit aktual, i cili, dorën në zemër, në çfarëdo rrethane, po bie në këmbë. Si macja!

Disa këtë ia pranojnë si shkathtësi. Disa të tjerë, ndoshta më pak miradashësi, këtë ia atribuojnë dorës së ngrohtë të kryediplomatit, i cili vitet e fundit pavarësisht kontekstit e ka mbrojtur dhe e ka ndihmuar me përkushtim.

Por të kthehemi te elasticiteti i kryeministrit. Disa e quajnë këtë edhe mungesë të kurajës! Disa e quajnë këtë pazar me çështjen kombëtare. Disa e quajnë dinakëri... disa gjenialitet. Disa e quajnë edhe paturpësi apo dyfytyrësi.

E “Cabi” këtë e quan elasticitet. Ai e sheh këtë vetëm si veti fizike. E ndrydh dhe ai lakohet!

Njëqind vjet po e mbajte nën atë presion, njëqind vjet rri i lakuar!

Merita e tij është se e ka kuptuar peshën që e ka sipër dhe raportin e tij me të. Ndërkohë që një pjesë e opozitës shpurth për t’i rezistuar peshës së madhe dhe vazhdimisht vetëlëndohet. Kështu fillojnë beteja të humbura.

Ndoshta, këtu është sekreti i “gjenialitetit”. Si ajo përralla me buburrecin që e sjell rrotën e mullirit. Gjithë atë peshë e sjell një buburrec i vetëm, sepse e “sjell” andej nga sillet vetë. Buburreci vrapon mbi rrotë dhe krenohet se po e sjell!

A ishte elastik “Ai” kur ishte fjala për qytetarët e këtij vendi që po protestonin paqësisht për të mbrojtur diçka që do të duhej ta bënte ai vetë? A ishte elastik kur është fjala te ish-veteranët, të cilët po kërkojnë një ligj për ta dhe të cilët kishin hapur çadrat para Kryeministrisë? A është elastik për fshatarët e Bellanicës që kërkojnë tokat e tyre? A ishte elastik kur e nxiste Vetëvendosjen për protesta, duke e quajtur “vetëfundosje” apo kuqezinjtë duke i quajtur “faqezinj”?

Pastaj papritmas vjen një vizitor me peshë! Elastiku menjëherë i fton për bisedë! Pesha?!

Kush mund të e zëvendësojë “atë”... - pyet “Cabi”. Adhurim apo dëshpërim?

“Vetëvendosje” edhe mund ta ketë gabim, por ata ende pa i shëruar plagët e 14 janarit sërish këmbëngulën ta sprovojnë “elasticitetin” e kryeministrit, i cili aktualisht duket se nuk mbron asgjë përpos pushtetit të vet. Për të janë krejt numra. Kjo qeveri nuk është ngritur mbi parime. Krejt janë bërë për numra. Ndoshta, këtu e kishte fjalën “Cabi”?

I kemi numrat - rezonojnë ata. Makineria e votimit nuk e ka gajle nga kush i merr votat.

Është fjala këtu për elasticitet? Apo për parime? Apo vetëm luftë e zhveshur vetëm për të mos rënë prej pushteti! Sepse pastaj bie shumëçka!

Nejse, u pa puna. “Cabi” e ka ndarë mendjen – i thash një miku në facebook! “Vetëvendosja” ka hyrë bungajave - po thotë!

Ani, çka nëse thotë “Cabi” - ma ktheu ai? Shpesh nuk ia ka qëlluar!

Pastaj, mos është president, ai?

Jo mik, nuk është - i thashë! Ende nuk është! Por, nuk dihet!

Asnjëherë nuk ia pranuan meritat, por pazar mund të bëhet.

Eh, elasticiteti!