Dita e mërkurë për lexuesit e gazetës “Zëri”, ka sjellë në grumbull shpërblimesh, ndër to edhe një skuter dhe një pushim në bregdetin turk, por për fat të keq, askush nga lexuesit nuk e ka blerë gazetën e cila do t’i sillte edhe çmimin kryesor të kësaj pjese të lojës shpërblyese, veturën “Citroen C3” dhe ky shpërblim bartet për ditën në vijim.

Mirëpo, edhe përkundër kësaj, vetëm gjatë ditës së mërkurë, janë ndarë mbi 100 shpërblime, ndërsa të gjitha shpërblimet e parapara të ndahen deri më 31 gusht 2011 dhe që nuk janë fituar nga lexuesit, do të barten në ditën në vijim, deri në fitimin e tyre, pra duke përfshirë edhe veturën.

Artan Kongjeli fitues i skuterit

Fituesi i skuterit të katërt deri më tani në lojën e madhe shpërblyese të “Zëri”-t, është Artan Kongjeli nga Prishtina, të cilit i ka buzëqeshur fati pikërisht të mërkurën. Artanit më në fund i është realizuar ëndrra e kamotshme e tij për të pasur një skuter, pasi nuk ka pasur mundësi ta ketë një të tillë.

“Ndjehem shumë i gëzuar që për herë të parë do të kem një skuter timin. Ju them të drejtën që gjithnjë duke ecur rrugës sytë më shkojnë kah shitoret me skuterë dhe ja që tani ëndërr ime u realizua nëpërmjet gazetës ‘Zëri’”, është shprehur Artani, i cili është lexues i rregullt i gazetës.

“E falënderoj shumë këtë të përditshme që nëpërmjet kësaj loje po i stimulon lexuesit. Jam lexues i rregullt i “Zërit” dhe gjithnjë edhe në të ardhmen do të jem”, ka përfunduar z.Kongjeli.

Bajram Uka për herë të parë viziton bregdetin turk

Për herë të parë pas moshës 60 vjeçare, Bajram Uka nga fshati Obranqë komuna e Podujevës, do ta vizitojë bregdetin e Turqisë, kjo pasi ai është fituesi i radhës i pushimit njëjavor të cilin e ndanë kompania më e njohur në Kosovë, “Eurokoha”.

Ai ndjehet mjaftë i gëzuar për këtë fakt dhe ndjehet fatlum që ishte fitues pikërisht i këtij çmimi. “Jam lexues i rregullt i gazetës më të mirë në vend ‘Zëri’. Jam me fat që fitova këtë çmim dhe për herë të parë pas kësaj moshe që kam, do ta vizitoj plazhin e Turqisë”, është shprehur z.Uka.

K.Bajrami

Loja shpërblyese ka sjellë shumë shpërblime në Pejë

Në lojën shpërblyese të dhjetë vjetëve më parë në “Zëri” Teuta Q. kishte fituar shpërblim një televizor. Jo shumë kohë pas luftës ky shpërblim kishte qenë i mirëseardhur për këtë familje pejane. Shumë vite prej atëherë në familjen e saj ende lexohet ‘Zëri’, kurse loja shpërblyese vazhdon përsëri.

“Ende s’kemi fituar, edhe pse shpresojmë ndonjë çmim. Kryesisht e shikoj në gazetën në punë dhe gërvishtja e faqes së parë është një prej gjërave të para me të cilat fillon dita e punës”, thotë ajo.

Asdren Kelmendi është një tjetër lexues i gazetës që pret shpërblimin. Ai thotë se në lokalin e tij e merr rregullisht gazetën, edhe pse më parë merrte gazeta tjera. “Prej që ka filluar loja, unë tashmë e kam ndërruar gazetën. Edhe më parë për klientët e lokalit mbaja ndonjë gazetë, por tani e marr ‘Zëri’-in pasi mund ta provoj dhe mbase fitoj ndonjë çmim”, thotë Kelmendi.

Në tavolinën e tij gazeta është gërvishtur vetëm në një pikë. S’po mund ta shoh shprehjen ‘Më shumë fat në numrin tjetër...’, kështu që veç pak po e hapi”, thotë me shaka Asdreni.

Një tjetër lexues që flet për lojën, është Besnik D. po nga Peja. Ai thotë se ka fituar një bluzë me logon e gazetës, por s’i ka arritur ende. “Fëmijët më çmendin se po e shohin emrin në gazetë, por ende nuk më ka arritur çmimi dhe shpreso se do të vjen këtyre ditëve”, thotë ai.

Loja shpërblyese gjatë gjithë verës ka ngjallur interesim jo të paktë të lexuesit në Pejë. Nuk kanë qenë të pakët ata që kanë fituar qoftë çmime të vogla simbolike, por ka pasur edhe fitues të mëdhenj, mes të cilëve edhe në dy raste fituesit e pushime në Turqi për nga një person, fitues të televizorit, por dhe dhjetëra fitues tjerë që kanë

fituar çmime në shuma të ndryshme parash dhe mbushje për telefoninë mobile.

E. Ulaj

Në Gjilan mirëpritet paralajmërimi për vazhdimin e lojës

Paralajmërimet se Loja e Madhe Shpërblyese e “Zëri”-t do të vazhdojë edhe pas dhënies së premisë kryesore, veturës “Citroën C3”, janë mirëpritur nga lexuesit e kësaj gazete në Gjilan, gazetë kjo që vazhdon të mbetet më e besueshmja dhe e atillë që lexuesve të vet për çdoherë u sjell befasi.

Xhelal Isufi, shitës gazetash, thotë se gazeta “Zëri” vazhdon të shitet më e para dhe se për të kërkesat janë gjithnjë në rritje. Ai thotë se paralajmërimi i gazetës se do të vazhdojë me lojën i ka gëzuar lexuesit, të cilët do të vazhdojnë t’i mbeten besnik kësaj gazete.

Sipas tij, do të ishte mirë që numri i gazetave të shtohet edhe më tepër dhe që të vazhdohet që qoftë nëpërmjet shkrimeve apo dhe në forma të tjera të joshen lexuesit, ngase leximi është një formë e mirë e ngritjes intelektuale të njeriut. Afrim Selimi, punëtor, thotë se nuk lë ditë pa e blerë gazetën “Zëri”, e cila siç thotë Afrimi është e mbushur me përplot materiale interesante, është gazetë e paanshme dhe me shkrime kritike ndaj atyre që nuk e respektojnë ligjin.

Është përshtypje se Loja e Madhe Shpërblyese veç sa e ka bërë më interesante gazetën dhe se mezi pret që të shoh se cili është hapi tjetër që do ta bëjë “Zëri” me paralajmërimet për vazhdimin e lojës.

Lexues i rregullt i gazetës “Zëri” është edhe Avni Sylejmani, profesor, i cili thotë se i pëlqejnë shumë shkrimet që kanë të bëjnë me sportin dhe zhvillimet që ndodhin në arenën ndërkombëtare.

Avniu thotë se është për vazhdimin e Lojës së Madhe Shpërblyese, të cilën e quan një formë të mirë të argëtimit. Ngjashëm shprehet edhe Ramadan Rexhepi, pensionist. Ai thotë se që prej kur është paraqitur në treg e përditshmja “Zëri”, ai ka qenë lexues i rregullt i saj dhe se do të vazhdojë ta lexojë edhe në të ardhmen.

Ramadani beson se “Zëri” do të vazhdojë ta mbajë nivelin që e ka e bile edhe ta rris atë dhe ketë po e dëshmon me befasitë që po ua sjell lexuesve të vet. Sipas tij, Loja e Madhe Shpërblyese gjithsesi se duhet të vazhdojë edhe në të ardhmen, ngase ajo është bërë pjesë e pandashme e lexuesve.

E. Sadiku