Anketat të cilat po zhvillohen në të gjitha komunat e Kosovës, me lexuesit e gazetave, tregojnë se gazeta “Zëri”, është më e lexuara dhe më e dashura për lexuesit, e në këtë drejtim ka kontribuar jo pak edhe loja shpërblyese.

Ndërsa vazhdimin e lojës shpërblyese e kanë përshëndetur të gjithë lexuesit, pasi sipas tyre, loja është bërë një argëtim për ta. Edhe pse jo domosdo loja i tërheq që ta blejnë gazetën, ajo e bën edhe më tërheqëse dhe më të kompletuar ‘Zëri’-n. Këto janë mendimet e të anketuarve tanë nga shumë rajone të Kosovës.

Për kaçanikasit “Zëri” numër një, loja le të vazhdojë

Gazeta “Zëri” me tirazhin më të madh në Kosovë, me më së shumti blerës e lexues si dhe shpërblyesja më e madhe e lexuesve, tashmë është familjarizuar me kaçanikasit. Ata thonë se pavarësisht kanë apo s’kanë lojë shpërblyese gazeta të tjera nuk blejnë e as nuk lexojnë. “Unë e blej dhe e lexoj vetëm ‘Zërin’.

Nuk marr gazetë tjetër. S’do me thënë se një gazetë ka dalë me lojë dhe më nxit ta blej e lexoj. Me ‘Zërin’ jam shumë, shumë i kënaqur, si me përmbajtjen e gazetës e po ashtu edhe me lojën shpërblyese”, shprehet Ismail Stagova, fituesi i njërit nga TV-të dhe i gjashtë shpërblimeve të tjera të Lojës Shpërblyese të “Zërit”.

Ai thotë se këtë gazetë e blen çdo ditë, ndërsa vazhdimi i lojës është i mirëseardhur. “Si jo, loja le të vazhdojë, sepse mund të fitojë edhe ndonjë shpërblim tjetër”, thotë Stagova, pronar i kafiterisë “New Born”.

Edhe Besim Hysa, një i ri, lutet që të vazhdojë loja shpërblyese. “Zëri’-n e lexoj çdo ditë. Kam fituar edhe një shpërblim”, thotë Besimi, adhurues i sidomos rubrikës “VIP”. Një lexues tjetër i rregullt i gazetës “Zëri”, për lojën shpërblyese bën ftesë që të vazhdojë, por kjo nuk e zmbraps për ta blerë këtë gazetë.

“Ka edhe gazeta të tjera, por ‘Zëri’ për mua është numër një dhe i vetëm. Njëra nga arsyet e mishërimit me këtë gazetë është se vazhdon të jetë opozita më e madhe e institucioneve.

Më pëlqejnë të gjitha rubrikat, e sidomos editorialet, opinionet, sporti...”, thotë Mehmet Berisha, pronar i një butiku në rrugën “Emin Duraku” në qytet. Ai thotë se edhe pse nuk ka ndonjë rëndësi, loja e “Zërit” është mirë të vazhdojë.

Edhe llapjanët e dëshirojnë vazhdimin e lojës

Lexuesit e shumtë llapjanë të gazetës “Zëri”, parapëlqejnë vazhdimin e Lojës shpërblyese, të cilët shpresojnë se ndonjëri prej tyre do të jetë edhe fitues fatlum i shpërblimit kryesor të veturës “Citroen C3”.

Të gjithë lexuesit e anketuar dëshirojnë që kjo lojë të vazhdojë edhe më tutje dhe çmojnë përmbajtjen e larmishme të artikujve mjaft cilësorë. "Tash jam mësuar edhe me lojën shpërblyese dhe nuk di si do të duket gazeta pa lojën", shprehet lexuesi i rregullt i “Zërit”, Ali Podvorica, nëpunës në KK të Podujevë.

Unë e lexoj ‘Zëri’-n edhe para lojës shpërblyese, sepse ajo më së shumti më plotëson kërshërinë time dhe interesin për temat dhe lajmet që posedon. Ndërsa i riu Fidan Fazliu, i cili parapëlqen faqet e argëtimit nga bota e shoubizit, thotë se loja shpërblyese është bërë pjesë e jetës së përditshme.

Yll Saliu, njëri prej fituesve të Lojës, disa herë nga 5 euro mbushje, thotë se vazhdimi i lojës veç sa e pasuron dhe e bën më tërheqëse gazetën për të gjithë lexuesit. Loja, sipas tij, është shtesë për të plotësuar anën tjetër argëtuese të tij.

Bastri Muçolli, shitës i gazetave pranë KK të Podujevës, thotë se ‘Zëri’-n pak kohë e lënë në shitje, pasi edhe ata numra që i shkojnë nuk i mjaftojnë për të gjithë lexuesit që i ka me porosi. “‘Zëri’ ishte dhe ka mbetur gazeta më e kërkuar në qoshkun tim.

Të gjithë ekzemplarët shiten qysh në orët e hershme dhe kam kërkesa të vazhdueshme gjatë tërë ditës”, shprehet ai. Se "Zëri" ka ngritur lexueshmërinë në shkallën prej 90 për qind prej që ka nisur Loja shpërblyese e dëshmojnë edhe të dhënat paraqitura të shefit të shitjes së gazetave në Podujevë, Sadik Zhjeqi.

“‘Zëri’ në Podujevë gjithmonë ka qenë gazeta më e lexuar e më e besuar në periudhën e pasluftës. Në Podujevë kjo gazetë shquhet për paanshmëri dhe larmi të temave nga fusha dhe veprimtari të ndryshme”, është shprehur ai.

Klinasit i gëzohen vazhdimit të pjesës së tretë të lojës shpërblyese

Lajmi se loja shpërblyese “Fito më zë” do të vazhdojë menjëherë pas fitimit të premisë kryesore “Citoren C3” nga ndonjë fatlum (ndonëse kjo kërkohet pikërisht të jetë nga Klina), ka gëzuar pa masë lexuesit besnik të ‘Zëri’-t.

Ruzhdi Gashi, një lexues i rregullt i gazetës ditore ‘Zëri’, tregon se “deri kohëve të fundit nuk ka qenë lexues i asnjë gazete ditore. Loja shpërblyese e gazetës ‘Zëri’ e ka nxitur atë që për çdo mëngjes kafenë e mëngjesit ta pijë duke shfletuar gazetën ‘Zëri’.

Gashi tregon se deri më tash nuk ka fituar asgjë, por thotë se do të ishte i lumtur sikur të jetë fitues i njërit nga shpërblimet kryesore të gazetës, pse jo edhe një pushim në bregdetin përrallor të Turqisë.

Në anën tjetër, edhe qytetarë të tjerë zakonisht pronarë të dyqaneve afariste, tregojnë të ndihen të kënaqur që gazeta ‘Zëri’ do të vazhdojë të sjellë befasi për ta edhe në pjesën e tretë të lojës shpërblyese.

Derisa më parë ‘Zëri’ në komunën e Klinës, nuk ishte ndër gazetat e para, ajo tashmë vazhdon ta ketë epitetin e gazetës më të lexuar dhe më të dashur për qytetarët e kësaj komune. Zeqir Merlaku, një lexues tjetër i gazetës ditore ‘Zëri’, thotë se “jam lexues sidomos i rubrikës së sportit pasi jam adhurues i flaktë i futbollit.

Në këtë gazetë, po kam çka të lexoj nga materialet sportive nga vendi dhe bota. Sa i përket lojës shpërblyese ende nuk kam fituar asgjë, shpresoj të jem fitues i ndonjërit prej shpërblimeve”.

Ndërkohë, Fahrije Bojaj, shitëse e gazetave ditore në komunën e Klinës, tregon për interesim të shtuar të qytetarëve që po e blejnë gazetën ditore ‘Zëri’. Ajo tregon se prej se ka filluar që bashkë më gazetën të jetë edhe loja shpërblyese, ‘Zëri’ është gazeta numër një në qoshkun e saj.

“Nëse nuk e merr deri në orën 10.30, shumë qytetarë mbesin pa të. Më së keqi ndihem kur lexuesit e përhershëm të ‘Zëri’-t, nganjëherë mbesin pa gazetën e tyre të dashur”, tregon Fahrija.