Prishtinë. Pjesa e tretë e lojës së madhe shpërblyese të gazetës “Zëri” është e mbushur me shpërblimet më të mira dhe më tërheqëse, kështu pohojnë lexuesit e shumtë të kësaj të përditshmeje, e si të mos jetë, kur tani kanë rastin të fitojnë iPhone 4, Sony PlayStation 3, shumë nga 5, 200 dhe 500 euro, pastaj DVD player, mbushje telefonike, kuponë në vlerë 50 euro nga MiniMax, librezë anëtarësie për fitnes, dhe normalisht, si në çdo pjesë të lojës, shpërblimi kryesor është vetura, e kësaj radhe të gjithë lojtarët kanë mundësi ta fitojnë Peugeot 206.

Tashmë janë fituar edhe disa nga shpërblimet e para “tërheqëse” siç i emërtojnë lexuesit. Fituesi i iPhone 4 nga “Europrinty” është Mërgim Mustafa, ai i Sony PlayStation 3 është Edmond Vllasaliu, ndërsa fituesi i parë i shumës prej 200 eurove që jepet çdo muaj, dhe që këtë shumë e dhuron Banka Ekonomike, është Marjan Palokaj nga Prishtina.

Por, ky është vetëm fillimi i dhënies së shpërblimeve të mëdha, ngase deri në fund të lojës kanë mbetur muaj të tërë dhe me mijëra shpërblime dhe të gjithë kanë mundësi të jenë fitues.

Loja më e besueshme dhe më cilësore

Lexuesit janë të kënaqur me vazhdimin e lojës dhe të gjithë shprehin falënderim për stafin e gazetës që mori vendim për vazhdim. Dafina Ymeri mendon që përveç lojës “Zëri” ofron edhe artikuj dhe tema për të gjithë.

“Kam vërejtur që prej se ka filluar loja “Fito me Zërin” është shtuar dukshëm numri i lexuesve. Dhe kjo gazetë përveç lojës që u ofron lexuesve, posedon edhe shumë artikuj dhe tema të ndryshme në faqet e saj”, tha Dafina. Ajo pohon se kjo e përditshme është ndryshe nga gazetat tjera. “Mua personalisht më pëlqen shumë ‘Zëri’ që mendoj se dallohet nga të përditshmet tjera në tregun kosovar”, tha Dafina Ymeri.

Se “Zëri” po kërkohet dhe lexohet me të madhe e dëshmon edhe lexuesja e rregullt Blerta Jashari.

“Zëri’ është gazetë që lexohet dhe kërkohet shumë. Ia vlen ta shfletosh sepse shtjellon tema të ndryshme dhe përveç saj ofron edhe lojën shpërblyese me të cilën vazhdon t’i stimulojë lexuesit. Kam dëgjuar që shumë lexues po shpërblehen uroj që këtë fat ta kem edhe unë së shpejti sepse jam një lexuese e rregullt e ‘Zërit”, tha ajo.

Sipas saj, kjo lojë është më transparentja momentalisht në tregun tonë.

“Loja shpërblyese ‘Fito me Zërin’ është loja më e besueshme dhe më cilësorja që gjendet momentalisht në treg”, përfundoi ajo.

K. Bajrami

Pasqyron realitetin ashtu si është

Siç pohuam, shpërblimet e shumta që po i ofron në këtë pjesë gazeta “Zëri” është duke i tërhequr me të madhe lexuesit ta blejnë këtë gazetë dhe ta gërvishtin kuponin me shpresë se do të jenë fitues. Kështu vepron edhe Ardianë Berisha, e cila thotë që është lexuese e rregullt e kësaj të përditshmeje.

“Gazetën ‘Zëri’ e blej me vite, por ditët e fundit jam duke e marrë më për qejf, jo vetëm për lojën shpërblyese, por edhe për cilësinë e saj. Më pëlqejnë faqet e kulturës dhe ato të botës së yjeve duke mos i lënë anash as faqet tjera, se vërtet edhe ato ofrojnë materiale të mrekullueshme. Ajo që më bie në sy te ‘Zëri’ është guximi i saj për t’i denoncuar dhe pasqyruar të gjitha të këqijat që po ndodhin në Kosovë”, tha ajo dhe shtoi: “Do të dëshiroja të jem fituese e iPhone 4, sepse ka kohë që jam duke e ‘ëndërruar’”.

Edhe lexuesi Ramadani Elshani mendon që “Zëri” është e përditshmja me e guximshme dhe më cilësore që gjendet në Kosovë. “Më besoni mezi pres të bëhet mëngjes e të shkoj ta blej ‘Zërin’ sepse çdo ditë sjell ndonjë gjë interesante dhe e pasqyron realitetin ashtu si është duke mos e kamufluar aspak. Kjo është ajo që më nxit ta marrë çdo ditë”, tha ky lexues.

Ai pohon se cilësia e gazetës është për t’u pasur lakmi, dhe se të gjitha gazetat tjera duhet të marrin mësim nga ‘Zëri’ se si duhet të paraqiten gjërat dhe të mos fshihen keqbërësit.

“Ta veçoj ndonjë rubrikë të kësaj gazete e kam shumë të vështirë, por unë më për qejfi i kam faqet e aktualitetit dhe ato të opinioneve, por gjithmonë duke mos i lënë anash as faqet tjera sepse edhe ato të ofrojnë shumëçka”, tha z. Gashi.

“Zëri”, më e dashura në Klinë

Klinë. Gazeta “Zëri” ka arritur të shtojë numrin e lexuesve të saj dhe kjo për faktin se kjo gazetë po u sjellë lexuesve të saj befasi të shumta. Fahrije Bojaj, shitëse e gazetave në Klinë, thotë se vetëm gjatë mëngjesit të së dielës deri në orën 8.30 në kioskën e saj ka shitur me dhjetëra ekzemplarë të gazetës “Zëri”.

Ajo tregon se para se të fillojë loja shpërblyese nuk ka mundur të shesë më shumë se disa copë të kësaj gazete, por tani kur kjo lojë po bëhet më shumë atraktive, numri i lexuesve të kësaj gazete sa vjen e shtohet.

Fahrija u bën thirrje distributorëve që të sjellin më shumë ekzemplarë të gazetës “Zëri”, sepse shumë lexues po mbesin pa të, pasi që kjo gazetë shkon me mëngjes. Ndërkohë, ajo tregon se vetëm në kioskën e saj për çdo ditë ka nga 3 deri në 4 fitues, kryesisht të mbushjeve telefonike por edhe shpërblime tjera. Sipas saj, qytetarët e kësaj komune po e dëshirojnë “Zërin” më shumë se çdo gazetë tjetër.

Ndryshe, “Zëri” po vazhdon të gjejë mbështetje të madhe edhe te lexuesit e rregullt të kësaj komune. Njëri ndër këta lexues Gjon Gjergjaj shkrimtar, shpreh admirim të madh për gazetën.

Ai tregon se çdo mëngjes “Zëri” është në duart e tij dhe si shkrimtar më së shumti ka dëshirë të shfletojë rubrikën e kulturës, pasi që edhe vetë pjesën më të madhe të jetës ia ka kushtuar librit dhe kulturës. Gjoni ndërkaq është edhe fitues i disa shpërblimeve të “Zërit”.

Edhe lexuesi tjetër Ilaz Gashi çdo mëngjes derisa udhëton për në vendin e tij të punës, në kioskën më të afërt thotë se e blen gazetën “Zëri”. Gashi gjithashtu shpreh konsideratën e tij të thellë për materialet që gjendën në brendi të “Zërit”, kurse edhe është fitues i njërit nga shpërblimet që atij gazeta ia ka dhuruar.

Ai shpreh ambicien e tij që të jetë fitues i ndonjërit nga shpërblimet kryesore, me të cilët “Zëri” vazhdon t’i befasojë lexuesit e vetë të dashur.

S. Haxhaj