Animatori dhe karikaturisti Mentor Berisha e ka nisur mjaft mirë vitin 2012. Atij i është konfirmuar pjesëmarrja në më së paku 5 festivale ndërkombëtare ku do ta përfaqësojë Kosovën me karikaturat e tij. Festivalet që e kanë konfirmuar pjesëmarrjen e tij janë: “International Cartoon Competition”- Berlin-Germany, “Palatifini Cartoons” Genoa- Italy si dhe tri festivale në Iran “The Fdjr International Cartoon Contest”, “International City and citizen Cartoon Contest” dhe “International Awakening World Award Cartoon Contest”.

Viti 2011 ishte mjaft i sukshesshëm për Mantorin pasi që nuk ishin të pakta festivalet ndërkombëtare ku ai u paraqit madje në njërin edhe morri çmim. Argjentina, Spanja, Irani, Romania, Turqija janë vendet të cilat ai përfaqësoi Kosovën me karikatura ndërsa në “The Middle East magazine-Cartoon Competition” të Londres u nderua me çmimin e parë dhe u botua në numrin e fundit të kësaj reviste.

Ajo që është më me rëndësi për të e që e ka bërë të ndjehet mirë sipas tij janë përfaqësimi në vendet të cilat ende nuk e kanë njohur Kosovën. “Aq më mirë jam ndier kur kam marrë pjesë në festivale që organizohen në shtete që ende nuk e kanë njohur Kosovën. Unë jam prezantuar si kosovar, ka qenë një kënaqësi shumë e madhe për mua”, ka thënë Berisha. Ai është atutor edhe i filmit të animuar “Molla e Kuqe 3” i pari i llojit të tillë i mëbshtetur institucionalisht.

Me këtë film ishte prezantuar në disa festivale si në Kosovë ashtu dhe jashtë saj. Brenda filmit që zgjat 8 minuta e 33 sekonda rrëfehet për një krimb, karakteri i të cilit është ndërtuar mbi bazën e vetive të gjindëshmërisë dhe kureshtjes. Ai në shumë situata bën sjellje të çuditshme, dhe të paparashikueshme. Është personazh mjaft karakteristik, me syze, me veti elastike dhe reagon shpejt.

Duket që brendësia e mollës, krimbit i përgjigjet në çdo aspekt. E tillë mbetet situata deri në çastin kur një thikë e mprehtë i futet brenda në mollë. I frikësuar, ai ikën nga njëra anë në tjetrën, duke u munduar t’i shmanget thikës. Për Berishën, “Molla e Kuqe” flet me gjuhën e aktualitetit kosovar. “Edhe ne përballemi me disa probleme që normalisht është dashur t’i kemi vetëm në ëndrra. Por shpesh bëjmë jetën e krimbit”, ka thënë Berisha. Pas shumë përpjekjeve, krimbi e ha një pjesë të mollës dhe del nga ajo.

Pasi që molla ndodhet në një lavaman, krimbi nga molla kërcen në vrimat e lavamanit dhe, duke rrëshqitur nëpër gypat e lavamanit, bie në kanalizim. Në kanalizim ambienti është shumë i errët, gjë që për krimbin është një shqetësim shumë i madh. Aty has në shumë vështirësi, të cilat nuk mbarojnë lehtë. Regjisor dhe animator i filmit, të bazuar në idenë e Rrezarta Gashit, është Mentor Berisha. Kjo është pjesa e tretë e filmit “Molla e Kuqe”, ndërsa në dy pjesët e para historia është e ndryshme vetëm se personazhi nuk ndryshon.