Ministri i Kulturës, Rinisë dhe Sportit, Memli Krasniqi, të martën gjatë pritjes së ekipit të filmit të metrazhit të shkurtër “Kthimi”, dukej se kërkonte pak hise në suksesin e këtij ekipi në festivalin e filmit ndërkombëtar “Sundance”, në Shtetet e Bashkuara të Amerikës, duke ia kujtuar se ky film është rezultat i festivalit të filmit “Nine Eleven”, dhe Nine Eleven është mbështetur nga Ministria e Kulturës, Rinisë dhe Sportit.

“Pas kthimit nga suksesi më i madh i filmit shqip deri tash, ajo që dua të them është se jam i nderuar që MKRS ka pasur mundësi të mbështesë këtë film në të gjitha fazat në festivalin “Nine Eleven”, ky film është produkt i këtij festivali”, ka thënë ministri Krasniqi .“Filmi i shkurtër ka arritur suksese të mëdha edhe në festivale të tjera.

Është rrugë që do ta ndjekim”, ka thënë ai, duke kujtuar se në favor të filmbërësve është duke u menduar edhe ndryshimi i Ligjit të kinematografisë, por edhe rritja e buxhetit për film.

Më e pakta në fjalë ishte regjisorja e këtij filmi, Blerta Zeqiri. Ajo shprehu falënderimet për pritjet që iu bënë nga ana e ministrit, duke thënë se për të është shumë e rëndësishme mirënjohja institucionale.

Kurse Blerim Gjoci, producent i filmit, pos që ka thënë se është kënaqësi që festivali i filmit “Nine Eleven”, është në kërkim të filmit sa më të mirë, për një përfaqësim sa më të mirë të Kosovës, ai ka shprehur në të njëjtën kohë edhe falënderimet për MKRS-në, sipas të cilit nga ky institucion janë përkrahur vazhdimisht.

Filmi “Kthimi”, i Blerta Zeqirit, është shpërblyer me çmimin si filmi më i mirë i shkurtër ndërkombëtar në festivalin “Sundance”, të SHBA-ve dhe ky çmim këtij filmi i ka hapur rrugën për garë në festivalin më prestigjioz të filmit “Oscar”. Një ditë më parë ekipi i filmit u prit nga kryetari i Komunës së Prishtinës Isa Mustafa.